سەرۆک بارزانی: ڕێککەوتننامەی 11ـی ئازار بووە هۆی بەهێزتربوونی دۆزی ڕەوای گەلی كوردستان

ئاڤا نیوز

 

سەرۆک بارزانی لە ساڵوەگەڕی واژۆکردنی ڕێککەوتننامەی 11ـی ئازار پەیامێکی بڵاوکردەوە و دەڵێت، "بۆ یەکەمین جار حکومەتی عێراقی دانی بە بەشێک لە مافەکانی گەلی کورد نا و ئەو دەرفەتە هاتە کایەوە گەلی کوردستان بتوانێ کار لەسەر خۆبەڕێوەبردن و بەهێزکردنی زمان و کولتوور و سەقامگیری بکات."

 

وێنە گەورەکە: زامننەکردنی مافە ڕەواکانی گەلی کوردستان، بەرهەڵستی و شۆڕشی چەکداری لەلایەن سەکردایەتی کورد بەدیهێنا، ڕێککەوتننامەی 11ـی ئازاریش وەک بەرهەمی شۆڕشی ئەیلوول سەیر دەکرێت کە لەناوەڕاستی سەدەی ڕابردوو بەسەرکردایەتی بارزانی نەمر کرا.

 

پەیامی فەرمی: سەرۆک بارزانی لە یادی 55 ساڵەی ئەو ڕێککەوتنەدا دەڵێت:-

-ڕێککەوتننامەی یازدەی ئاداری 1970 دەستکەوتێکی مێژوویی و گرنگی خەباتی گەلی کوردستانە بە ڕابەرایەتیی بارزانیی نەمر.

-بۆ یەکەمین جار حکومەتی عێراقی دانی بە بەشێک لە مافەکانی گەلی کورد نا و ئەو دەرفەتە هاتە کایەوە گەلی کوردستان بتوانێ کار لەسەر خۆبەڕێوەبردن و بەهێزکردنی زمان و کولتوور و دابینکردنی سەقامگیری بکات.

-ئەو ڕێککەوتنە بەرهەمی تێکۆشان و خەباتی پێشمەرگە و سەرجەم چین و توێژەکانی کوردستان لە شۆڕشی ئەیلوول بوو و بووە هۆی بەهێزتربوونی دۆزی ڕەوای گەلی کوردستان.

-پێشمەرگە و خەباتگێڕانی شۆڕشی ئەیلوول بە کۆڵنەدان و پێداگری و ورەی پۆڵایینیان دەستکەوتی گەروەیان بۆ گەلەکەیان مسۆگەر کرد.

باکگراوند: ڕێککەوتننامەی 11ـی ئاداری 1970 لە 15 خاڵ پێکهاتبوو، ڕێککەوتنەکە لە نێوان مستەفا بارزانی، ڕێبەری شۆڕشی کوردستان و ئەنجوومەنی سەرکردایەتی شۆڕشی عێراق بوو. لەم ڕێککەوتنە بۆ یەکەمجار کورد وەک پێکهاتەیەکی سەرەکی و زمانی کوردی وەک زمانی دووەمی عێراق دانیپێدانرا.