شاندێکی دیکەی وەزارەتی دارایی بۆ مووچە سەردانی بەغدا دەکات

ئاڤا نیوز

شاندێکی دیکەی وەزارەتی دارایی و ئابووریی کوردستان بۆ پرسی مووچەی مانگی دوو و چارەسەرکردنی گرفتەکانی هاوتاکردنی مووچەی خانەنشینان سەردانی بەغدا دەکات.

وێنە گەورەکە: هەرچەندە لە سەرەتای ئەمساڵەوە هەولێر و بەغدا ڕێککەوتنی گشتگیریان لەسەر کۆی مووچەکانی ئەمساڵ کرد، بەپێی ڕێککەوتنەکەش دەبووایە هەموو مانگێک مووچە بێ کێشە بنێرێت، بەڵام پێچەوانەی ڕێککەوتنەکە تەیف سامی، وەزیری دارایی عێراق بیانووی جۆراوجۆر دەگرێت و ئەمڕۆ کە 11ی مانگی سێیە تاوەکو ئێستا بڕیاری ناردنی مووچەی مانگی دووی نەداوە.

زانیاریی پەیامنێر: دەروون مەلا ناجی، پەیامنێری ئاڤا لە بەغدا ڕایگەیاند، ئەمشەو یان سبەی چوارشەممە شاندێکی دیکەی وەزارەتی دارایی و ئابووریی هەرێمی کوردستان بۆ دوو پرس سەردانی بەغدا دەکات؛ لێکۆڵینەوە لە هۆکاری نەناردنی مووچەی مانگی دوو و گفتوگۆکردن لەسەر چارەسەرکردنی کێشەکانی پەیوەست بە مووچەی خانەنشینان، بەتایبەت لێبڕینی 3%ی مووچەی 10 ساڵی بنەڕەتییان.

ڕەنگە ئاوات شێخ جەناب، وەزیری دارایی سەرۆکایەتی شاندەکە بکات، لە کۆبوونەوەکانیشدا ئەو کۆنووسە واژۆ دەکرێت کە لەلایەن تیمە تەکنیکییەکانی هەردوولا ئامادەکراوە.

ئەوەی پێویستە بیزانیت: شاندێکی تەکنیکی وەزارەتی دارایی کوردستان ڕۆژی 26-2-2025 لیستی مووچەی مانگی دوویان برد بۆ بەغدا و ماوەی هەشت ڕۆژ مانەوە بۆ ڕوونکردنەوەدان و وەڵامدانەوەی پرسیار و تێبینییەکانی وەزارەتی دارایی عێراق، ڕۆژی یەکشەممە 9-3-2025 لەسەر داواکاریی تەیف سامی جارێکی دیکە چوونەوە بەغدا و تاوەکو ئێستا نەگەڕاونەتەوە.