ئیخڵاس دلێمی: لە دوو ڕۆژی داهاتوودا مووچە بۆ کوردستان دەنێردرێت

ئاڤا نیوز

 

جێگری سەرۆکی لیژنەی دارایی پەرلەمانی عێراق، پێشبینی دەکات لە دوو ڕۆژی داهاتوودا مووچەی مانگی دووی فەرمانبەران و مووچەخۆرانی هەرێمی کوردستان خەرج بکرێت.

 

لێدوانی فەرمی: ئیخڵاس دلێـمی، جێگری سەرۆکی لیژنەی دارایی پەرلەمانی عێراق بە ئاڤا میدیا ڕاگەیاند: ئەوەی ڕوونە بۆ هەموو حکومەت و لایەن و تەنانەت وڵاتانی دەرەوەش، پرسی مووچەی فەرمانبەرانی هەرێمی کوردستان بە سیاسی کراوە، سەبارەت بە مووچەی مانگی دوو، لیست نێردراوە و دواتر لیستەکەیان گەڕاندەوە، وەکو هەمیشە کاتی دەوێت، ئێستاش ڕێککەوتن کرا ڕەنگە لە دوو ڕۆژی داهاتوودا مووچە خەرج بکرێت.

 

زانیاریی زیاتر: ڕۆژی 26-2-2025 لیژنەیەکی تەکنیکی وەزارەتی دارایی و ئابووری لیستی مووچەی مانگی دووی بردە بەغدا، ماوەی هەشت ڕۆژ بۆ ڕوونکردنەوە و وەڵامدانەوەی پرسیار و تێبینییەکانی وەزارەتی دارایی عێراق مانەوە.

 

 ئەوەی پێویستە بیزانیت: ڕۆژی 9-3-2025 لەسەر داواکاریی تەیف سامی جارێکی دیکە شاندە تەکنیکییەکەی وەزارەتی دارایی و ئابووری چوونەوە بەغدا، تاوەکو ئێستا نەگەڕاونەتەوە.