ژمارەیەک چالاکوانی مافی ئافرەتان لە ڕۆژهەڵاتی کوردستان دەستگیر دەکرێن

ئاڤا نیوز

لەسەر بەشداربوون و ڕێکخستنی چالاکییەکانی هەشتی مارس لە ڕۆژهەڵاتی کوردستان، چوار چالاکوانی ئافرەت دەستگیرکران.

ڕاگەینراوی فەرمی: بەگوێرەی ڕاگەیێنراوی ڕێکخراوی مافی مرۆڤی هەنگاو، لەلایەن ئیتلاعات و هێزە ئەمنییەکانی ئیرانەوە، چوار چالاکوانی ئافرەت کە لە بواری مافەکانی ژنان کار دەکەن، لە ڕۆژهەڵاتی کوردستان دەستگیرکراون و تووندوتیژیشیان بەرامبەر ئەنجام دراوە.

ئەوەی پێویستە بیزانیت: ئەو چوار ئافرەتە کوردەی دەستگیر کراون، ئەمانەن:

- سۆهەیلا موتاعی، لە چالاکانی بواری مافەکانی ئافرەتان لە شاری دێولان لە ڕۆژهەڵاتی کوردستان لە لایەن ئیتلاعاتەوە دەستبەسەر کراوە.

- باران ساعیدی، چالاکی مەدەنی تەمەن 45 ساڵ لە لایەن ئیتلاعاتەوە بەبێ نیشاندانی هیچ بەڵگەیەکی دادوەری، بە سازکردنی کەشی ترس لە ماڵەکەیدا دەستبەسەر کرا.

- لەیلا پاشایی، خەڵکی شاری سەقز و یەکێک لە چالاکانی بواری مافەکانە لە شاری سنە، بەهۆی بەشداریکردن لە ڕێوڕەسمی هەشتی مارس، لەلایەن هێزەکانی ئیدارەی ئیتلاعاتەوە دەستبەسەر کرا، لەیلا پاشایی پەیامی کۆتایی ئەو ڕێوڕسمەی خوێندبوویەوە.

- سۆما محەممەد ڕەزایی، چالاکی مەدەنی تەمەن 38 ساڵ لە شوێنی کارەکەی خۆی لە مۆڵی ئەڵماسی سنە دەستبەسەر کرا.

زانیاریی زیاتر: تاوەکو ئێستا زانیاری ورد لە سەر چارەنووس و شوێنی ڕاگیرانی ئەم چوار چالاکوانە کوردە لە بەر دەستدا نییە.