بەنگین ڕێکانی: بەهۆی نەبوونی پارەی پێویست بەشێکی پڕۆژەکان دوادەکەون

ئاڤا نیوز

وەزیری ئاوەدانکردنەوە و نیشتەجێبوونی عێراق ئاشکرایکرد، بڕیار بوو لە ماوەی شەش ساڵدا پڕۆژەکانی کەمکردنەوەی قەرەباڵغی و جەنجاڵی لە بەغدا تەواو بکرێن، بەڵام ڕەنگە بەهۆی نەبوونی نەختینەیی و پارەی پێویست دوا بکەون.

لێدوانی فەرمی: بەنگین ڕێکانی، وەزیری ئاوەدانکردنەوە و نیشتەجێبوونی عێراق لە چاوپێکەوتنێکی تەڵەڤزیۆنیدا ڕایگەیاند:

- لە ساڵی 2023 ـەوە دەستمان بە پڕۆژەکانی نەهێشتنی جەنجاڵی بەغدا کرد و بڕیار بوو لە ماوەی شەش ساڵدا سەرجەم کارەکان تەواو بکرێن، بەڵام بەهۆی نەبوونی نەختینەی پێویست تا ڕادەیەک بەشێکیان دوادەکەون، چونکە عێراق بۆ جێبەجێکردنی پڕۆژەکان بە تەواوی پشت بە نەوت دەبەستێت، نرخی نەوتیش ناجێگیرە.

- ئێستا نزیکەی چوار ملیۆن ئۆتۆمبێل خزاونەتە نێو شەقامەکانی بەغداوە، لەکاتێکدا ئەو شەقامانە توانای لەخۆگرتنی زیاتر لە 500 هەزار ئۆتۆمبێلی نییە.

- لە سەرانسەری جیهاندا شەش کۆمپانیای فڕۆکەوانی کراونەتە لیستی ڕەشی ئەوروپا، لەوانە دوو کۆمپانیای عێراقین.

- سەبارەت بە قەیرانی نیشتەجێبوون، ساڵانە عێراق پێویستی بە 250 هەزار یەکەی نیشتەجێبوون هەیە، هاوکات تەنیا لەبەغدا زیاتر لە دوو ملیۆن کەس شایستەی وەرگرتنی زەوین. هاوکات بۆ دابینکردنی خزمەتگوزارییەکان ئەو ناوچانە پێویستییان بە 30 ترلیۆن دینار هەیە.