فایلی خەڵک؛ دیمەنێکی پیس و بێزارکەر لە کۆمەڵگەیەکی هەولێر

ئاڤا نیوز

کێشەی ئاوەڕۆی ماڵان کۆمەڵگەیەکی هەولێری هەراسان کردووە کە دیمەنێکی پیس و بێزارکەری هەیە، خەڵکی کۆمەڵگەکە پەیوەندییان بە ئاڤاوە کرد و داوای بەدواداچوون دەکەن.


کێشەکە چییە؟ هەرچی ئاوەڕۆ و پیسایی ماڵان و ئاوی باران هەیە هەمووی تێکەڵی یەکتر دەبێت  و بەنێو ماڵ و بازاڕ و چێشتخانە و سەوزە و تەڕە فرۆشاندا دەڕوات، دیمەنێکی ناشرین، بۆنێکی پیس و ناخۆشی هەیە.

زانیاریی تایبەت: یەکێک لە دانیشتووانی مەلا ئۆمەر بۆ ئاڤا میدیا وتی، بۆنەکەی بەتایبەت لە وەرزی هاویندا زۆر ناخۆشە و "پێی هەراسان بووینە"، بە زستانیش هەندێکجار لافاو هەڵدەستێ و مەترسی خنکانی منداڵ هەیە.

هۆکارە زانراوەکان: تیمی ئاڤا سەردانی شوێنەکەی کردووە و دەردەکەوێ کە کەمتەرخەمی هەیە و بەشێکی کەمتەرخەمییەکە لە ئەستۆی حکومەتە کە کاری تێدا نەکردووە و نەیکردووەتە ئاوەڕۆی سندووقی، بەڵام بەشێکیشی لە ئەستۆی خەڵکەکەیە، ئاوەڕۆکەیان کردووەتەوە زبڵدان و هەموو شتێکی تێ فڕێ دەدەن، جگە لەمە بەشێکی خانووەکان بە زێدەڕۆ دروستکراون، بیری توالێتیان دروست نەکردووە و بۆڕییەکەیان بۆ ناو ئاوەڕۆکە ڕاکێشاوە.

لێدوانی فەرمی: زەردەشت عەبدولخالق، بەڕێوەبەری ئاو و ئاوەڕۆیی هەولێر بۆ ئاڤا میدیا وتی،

- ئاوەڕۆکە پێشتر کەندەڵانێکی سروشتی بووە و بەهۆی زۆر بوونی ماڵەکانەوە وەکو زێرابی لێهاتووە.

- نووسراویان بۆ ئەنجوومەنی وەزیران کردووە تا ئاوەڕۆی سندووقی لێ دروست بکەن، ئەنجوومەنی وەزیرانیش ڕەزامەندی داوە و بڕیاری داوە بڕی یەک ملیار و 200 ملیۆن دینار بۆ پرۆژەکە تەرخان بکرێت، ئێستا لە وەزارەتی داراییە و چاوەڕوان دەکەن پارەکەی بۆ خەرج بکرێت، دواتر دەست بە جێبەجێکردنی پڕۆژەکە بکرێت و بدرێتە بەڵێندەرێک.