پاساوەكانی تەیف سامی بۆ نەناردنی مووچە چین؟

ئاڤا نیوز

 

بریكاری دەستلەكاركێشاوەی وەزارەتی دارایی عێراق ڕایدەگەیەنێت، پاساوەكانی تەیف سامی بۆ دواخستنی مووچەی مووچەخۆرانی هەرێمی كوردستان، بیانووگرتنی بێ بنەمان.

 

وێنە گەورەكە: ڕێباز حەملان، بڕیكاری دەستلەكاركێشاوەی وەزارەتی دارایی عێراق، لە گەشتی هەواڵەکانی كاتژمێر حەوتی ئاڤا بەشداربوو، وەڵامی ژمارەیەك پرسی دایەوە پەیوەست بە دواكەوتنی مووچەی مووچەخۆران و پاساوەكانی بەغدا بەرامبەر هەرێمی كوردستان.

لێدوانی فەرمی: بە وتەی ڕێباز حەملان، بریكاری پێشووی وەزارەتی دارایی عێراق، پاساوەكانی تەیف سامی، وەزیری دارایی عێراق بۆ نەناردنی مووچەی مووچەخۆرانی هەرێمی كوردستان ئەمانەن:

یەكەم داواكردنی كۆدی بانكی مووچەخۆرانی هەرێمی كوردستان كە بە ئای بان ناسراوە، وەك بەشێك لە داواكاریی تەوتینی مووچەی فەرمانبەرانی هەرێمی كوردستان.

دووەم: لێبڕینی 3٪ـی خانەنشینی لە خانەنشینان و فەرمانبەرانی هەرێمی كوردستان لەنێوان ساڵانی 2014 تاوەكو 2024.

سێیەم: هەبوونی كەموكوڕی لە لیستی مووچەخۆران و ڕاپۆرتی وردبینیكردن لە میزان موراجەعەی خەرجی و داهاتی مانگانە.

 

ئەوەی پێویستە بیزانیت:  ڕێباز حەملان، بریکاری دەستلەکارکێشاوەی وەزارەتی دارایی عێراق وەڵامی سێ پاساوەکەی بەغدا بەمشێوەیە دەداتەوە:

- بەغدا ئەو مافەی نییە ڕاستەوخۆ داوای كۆدی بانكی مووچەخۆران بكات و ئەو داواكارییە یاسایی نییە، تەنانەت ئێستا وەزارەتی دارایی عێراق چۆن تەمویلی مووچەی وەزارەتێكی حكومەتی فیدڕاڵی دەكات، داواكراوە بەهەمان شێوەش تەمویلی مووچەی هەرێمی كوردستان بكات.

 

- هەرێمی كوردستان بەپێی یاسا كۆنەكە، بڕی 7%ـی مووچەی بنەڕەتی فەرمانبەرانی دەبڕی، ئێستا كە بەغدا داوا دەكات بڕی 3%ـی دیكەش ببڕدرێت، پاساو نییە بۆ دواخستنی ناردنی مووچە، بەو پێیەی ڕێككەوتن لەنێوان هەرێمی كوردستان و عێراق كراوە ئەو بڕە لێبڕینە بەشێوەی قیست لە مووچەی فەرمانبەران و خانەنشینان بگێڕدرێتەوە و لەماوەی پێنج ساڵ.

 

- مانگە لیژنەكانی چاودێریی دارایی عێراق خۆیان لە ئامادەکردنی لیستی مووچە و وردبینیکردن و میزان موراجەعەکەی بەشدار دەبن، بەر لەوەی لیستەكان بنێردرێت بۆ بەغدا، هیچ پاساوێك نییە بگوترێت كەموكوڕی لە ڕاپۆرت و لیستەكان هەیە.