سبەی پێنجشەممە دەست بە دابەشکردنی مووچەی مانگی دوو دەکرێت

ئاڤا نیوز

تەمویلی مووچەی مانگی دووی مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابووری هەرێمی کوردستان لە لقی هەولێری بانکی ناوەندیی عێراق و سبەی دەست بە دابەشکردنی مووچە دەکرێت.

 

چیرۆکی سەرەکی: پێشنیوەڕۆی ئەمڕۆ چوارشەممە 12-03-2025، وەزارەتی دارایی عێراق بڕی 957 ملیار و 925 ملیۆن و 880 هەزار و 78 دیناری وەک تەمویلی مووچەی مانگی دوو خستە سەر هەژماری بانکی وەزارەتی دارایی و ئابووری هەرێمی کوردستان.

 

ڕاگەیێنراوی فەرمی: وەزارەتی دارایی و ئابووری هەرێمی کوردستان لە ڕاگەیێنراوێکدا دەڵێت، "سبەی پێنج شەممە 13-03-2025، دەست بەدابەشکردنی مووچەی مانگی دووی فەرمانبەران و مووچەخۆرانی هەرێمی کوردستان دەکرێت و لە چەند ڕۆژێکدا مووچەی سەرجەم مووچەخۆران دابەش دەکرێت."

 

ئەمەش بزانە: لەماوەی ڕۆژانی داهاتوو ڕاپۆرتی تەرازووی پێداچوونەوەی مانگی دوو ئامادە دەکرێت بەمەبەستی دیاریکردنی پشکی گەنجینەی فیدراڵی لە داهاتی نانەوتی هەرێمی کوردستان و ناردنی بۆ وەزارەتی دارایی حکومەتی فیدراڵ لەنزیکترین کاتدا، هاوکات لەچەند ڕۆژی داهاتوو لیستی مووچەی مانگی سێ ڕادەست دەکرێت.