ڕاوێژکاری سەرۆکوەزیرانی عێراق: لێخۆشبوون بۆ هاوردەکردنی غاز لە ئێرانەوە بەردەوامە

 

ئاڤا نیوز

ڕاوێژکاری پەیوەندییەکانی دەرەوەی سەرۆک وەزیران ڕەتیدەکاتەوە ئەمریکا نیازی هەبێت بانکی ڕافیدەین سزا بدات و ئاماژە بۆ ئەوە دەکات، لێخۆشبوونی هاوردەکردنی غاز لە ئێرانەوە بەردەوامە، پرسی هەڵوەشانەوەی گرووپە چەکدارەکانیش بە بابەتێکی ناوخۆیی دادەنێت و دەڵێت، هەڵوەشانەوەیان لەناو پەیامەکانی مەرجەعی باڵا و بەرنامەی حکومەتدا هەیە و هەندێکیشیان مەرجیان هەیە بۆ ئەوەی تێکەڵ بە حەشدی شەعبی بکرێنەوە.

چیرۆکی سەرەکی: ڕاوێژکاری پەیوەندییەکانی دەرەوەی سەرۆک وەزیرانی عێراق، لە میانی دیدیدارێکی تەلەڤزیۆنیدا تیشکی خستە سەر چەند پرسێک لەوانە، سزاکانی ئەمریکا بۆسەر کەرتی بانکی و پەیوەندییەکانی نێوان عێراق و ئەمریکا و وڵاتانی دیکەی دراوسێی عێراق و پێشهاتەکانی ئەمدواییەی سووریا و چارەنووسی ئەلیزابێس تسۆرکۆڤ.

لێدوانی فەرمی: فەرهاد عەلائەدین، لەبارەی سزای سەر کەرتی بانکیی عێراق ڕایگەیاند: وەزارەتی گەنجینەی ئەمریکا ڕەتیکردووەتەوە هیچ نیازێکیان هەبێت بۆ سزادانی بانکی ڕافیدەین، هەروەها کۆمپانیا ئەمریکییەکان کار بۆ دووبارە داڕشتنەوەی بانکی ڕافیدەین دەکەن و هیچ نیازێک نییە سزای بەسەردا بسەپێنێت.

٠ لە ساڵی 2011ـەوە عێراق لە پێشینەی کارەکانی ئەمەریکا نەبووە، کاردەکەین بۆ گۆڕینی ئەو تێڕوانینەی ئەمریکا کە عێراق بەشێک نییە لە دۆسیەی ئێران.

٠ ڕۆژانە گفتوگۆ لەسەر چارەنووسی گرووپە چەکدارەکان دەکرێت.

٠ ئەلیزابێس تسورکۆڤ بە شێوەیەکی یاسایی هاتووەتە ناو عێراق و حکومەت بەرپرسیارە لە پاراستنی.

٠ مانەوەی چارەنووسی تسورکۆڤ بەم شێوەیە دەبێتە کێشە بۆ عێراق.

٠ بەپێی زانیارییەکانی حکومەت، تسورکۆڤ لە ژیاندا ماوە.

٠ هەڵوەشانەوەی لێخۆشبوونەکە بۆ هاوردەکردنی کارەبایە، بەڵام هاوردەکردنی غاز بەردەوامە.

٠ ڕووداوەکانی سووریا هاندەر نین بۆ ئەوەی عێراق بەڕووی سەرۆکی ئیدارەی سووریا، ئەحمەد شەرعدا بکرێتەوە.

٠ داعش پێداویستییەکانی دەستکەوتووە و دەستی بەسەر چەکدا گرتووە لە سووریا، عێراقیش لەو بارەیەوە نیگەرانە.

٠ 25%ـی نەوتی عێراق لەلایەن چینەوە دەکڕدرێت، پشکێکی بەرچاومان لەو وڵاتەدا هەیە.

٠ پەیوەندی عێراق لەگەڵ چین و ڕووسیا بازرگانییە، نەک سیاسیی.

٠ پەیوەندییەکانمان لەگەڵ سعوودیە لە باشترین ئاستیدایە، سعوودیەش هیچ نیگەرانییەکی نییە لە پەرەسەندنی پەیوەندییەکانی عێراق لەگەڵ قەتەر.

٠ هیچ گۆڕانکارییەک بەسەر ڕێککەوتنی کۆتاییهێنان بە ئەرکی هاوپەیمانی نێودەوڵەتی لە عێراقدا نەهاتووە.

٠ کۆتاییهاتنی هاوپەیمانی نێودەوڵەتی ڕێگە بە عێراق دەدات جۆری ئەو هێزە بیانییە دیاری بکات کە پێویستی پێیەتی.