کەنەدا بەشێک لە سزاکانی سەر سووریا هەڵدەگرێت

ئاڤا نیوز

کەنەدا بڕیاری دا بەشێک لە سزاکانی سەر سووریا هەڵبگرێت، ئەمەش وەک دووپاتکردنەوەی پشتیوانی  بۆ حکومەتی ڕاگوزەری ئەو وڵاتە.

چیرۆکی سەرەکی: ڕۆژی 2025-03-12، کەنەدا بەشێک لە سزاکانی سەر سووریای هەڵگرت و دانانی باڵیۆزێکی بۆ دیمەشق ڕاگەیاند، ئەمەش لە کاتێکدایە کە دەسەڵاتدارانی سووریا بۆ قۆناغی ڕاگوزەر داوای پشتیوانی نێودەوڵەتی دەکەن.

ڕاگەیێنراوەی فەرمی: وەزارەتی دەرەوەی کەنەدا لە ڕاگەیێنراوێکدا ڕایگەیاند : کەنەدا بە بڕی 84 ملیۆن دۆلار هاوکاری مرۆیی پێشکەش بە سووریا دەکات وەک پاڵپشتییەک بۆ حکومەتی نوێ و هاووڵاتییانی و دووبارە نۆژەن کردنەوەی سووریا.

بە تەنیشت ئەم بابەتەوە: عومەر غەبرە، نێردەی کەنەدا بۆ سووریا ڕایگەیاند: کەنەدا دەتوانێت ڕۆڵێکی کاریگەر بگێڕێت بۆ ئەوەی سوورییەکان بتوانن وڵاتێکی  گشتگیر بوونیاد بنێن لەسەر بنەمای ڕێزگرتن لە هەموو پێکهاتەکان''.

لە لایەکی دیکەوە: کەنەدا، ستیڤانی ماکولوم، باڵیۆزی وڵاتەکەی لە لوبنان وەک باڵیۆزی نوێ لە سووریا دیاری کرد.

بۆچی گرنگە: هەڵگرتنی بەشێک لە سزاکانی سەر سووریا لە لایەن کەنەدا هەنگاوێکی گرنگە بۆ ئەوەی وڵاتانی دیکەش سزا نێودەوڵەتییەکانی سەر ئەو وڵاتە کەم بکەنەوە و سووریا دووبارە ئاوەدان بکەنەوە و دۆخی هاووڵاتییانی باشتر ببێت.