وەزیری کاری عێراق: بوونی کرێکارە سوورییەکان لە عێراق نایاساییە

ئاڤا نیوز

وەزیری کار و کاروباری کۆمەڵایەتی حکومەتی عێراق ڕایدەگەیێنێت، بوونی کرێکارانی سووری لەو وڵاتە نایاساییە و زۆربەیان لەڕێگەی قاچاغەوە هاتوونەتە ناو وڵات یان لە هەرێمی کوردستانەوە هاتوون.

 

وێنە گەورەکە: لەدوای ڕووداوەکانی ئەمدواییەی سووریا و کوژرانی عەلەوییەکان لەو وڵاتە، گوشارەکان بۆ سەر هاووڵاتیانی سووری نیشتەجێی عێراق تا دێت زیاتر دەبێت.

 

لێدوانی فەرمی: ئەحمەد ئەسەدی، وەزیری کار و کاروباری کۆمەڵایەتی حکومەتی عێراق لە دیدارێکی تەلەڤزیۆنیدا ڕایگەیاند: ژمارەی کرێکارانی عەرەب و بیانی لە عێراق دەگاتە نزیکەی 800 هەزار کرێکار و نزیکەی 80 بۆ 90٪ـی ئەو کرێکارانەی لە چێشتخانەکانی بەغدا کار دەکەن، سوورین.

 

ئەوەی پێویستە بیزانیت: ئەحمەد ئەسەدی دەشڵێت:

- بوونی کرێکارانی سووری لە عێراق نایاساییە، هاوکات زۆربەیان لەڕێگەی قاچاغەوە هاتوونەتە ناو وڵاتەوە یان لە هەرێمی کوردستانەوە هاتوون.

- بڕیارمان دا بۆ ڕاستکردنەوەی دۆخی کرێکارانی بیانی، بەڵام سوورییەکان سوودیان لێ وەرنەگرت، چونکە بەشێوەیەکی نافەرمی هاتوونەتە عێراق.

 

ئەوەی پێویستە بیزانیت: ڕۆژێک پێشتر وەزارەتی ناوخۆی عێراق هۆشداری بەو سوورییانەدا کە نیشتەجێی عێراقن و هەڕەشەی دیپۆرتکردنەوەیانی لێکردبوون ئەگەر بێت و هەوڵی نانەوەی فیتنە بدەن و ڕێز لە بەهاو داب و نەریتەکان نەگرن.