چالاکوانانی رۆژهەڵاتی کوردستان داوا لە خەڵک دەکەن یاری ئاگرینی مەترسیدار بەکارنەهێنن

ئاڤا نیوز

لە بەرەبەری ساڵی نوێ و هاتنەوەی نەورۆز، چالاکوانانی رۆژهەڵاتی کوردستان داوا لە خەڵک دەکەن یارییە ئاگرینە مەترسیدارەکان بەکارنەهێنن و ئارامی شار و مافی خەڵک بپارێزن و گیانی خۆشیان نەخەنە مەترسییەوە.

وێنە گەورەکە: ساڵانە بە بۆنەی هاتنەوەی نەورۆز و ساڵی نوێی کوردی، هاونیشتمانیانی ڕۆژهەڵاتی کوردستان ئامادەکاری بۆ ئاهەنگ گێڕان دەکەن و بە هۆیەوە یاری ئاگرین بەکار دەهێنن،

ژمارەکان وا دەڵێن: بەپێی راپۆرتی فریاکەوتنی خێرای ئێران، هێشتا یەک هەفتەی بۆ نەورۆز ماوە، بەڵام تاوەکو ئێستا سێ کەس بەهۆی بەکارهێنانی یارییە ئاگرینەکانەوە گیانیان لەدەستداوە و لانیکەم 209 کەسیش بریندار بوون.

زانیاریی زیاتر: رێکخراوی ژینگەپارێزی ژینکۆی شنۆ بۆ رێگری لەو جۆرە رووداوانە، داوای لە خەڵک کردووە "نەریتە کۆن و جوانەکان کە هەمیشە دەرفەتێک بووە بۆ شادی و هاودەنگی بپارێزن و خەڵک خۆیان بەدوور بگرن لە بەکارهێنانی ماددەی سوتێنەری مەترسیدار."

لێدوانی فەرمی: رەشید ناسرزادە، یەکێک لە بەڕێوەبەرانی رێکخراوی ژینکۆ، دەڵێت: "زیادەڕەوی لە بەکارهێنانی ماددە سووتێنەرە مەترسیدارەکان نەک تەنیا سەلامەتی و ئارامی گشتی تێکدەدات، بەڵکو ساڵانە دەبێتە هۆی لەدەستدانی ژیان و زیانی دارایی قەرەبوو نەکراوە بۆ هاووڵاتییانمان."

ئەوەی پێویستە بیزانیت: لە شاری شنۆ، سەر بە پارێزگای سنە، لە ساڵانی رابردوودا لە کۆتایی ساڵدا دووجار رێوڕەسمی چوارشەممە سووری بەڕێوەدەچوو و بەهۆی ئەوەی لە رادەبەدەر یارییە ئاگرینە مەترسیدارەکانی تێدا بەکاردەهات، ببووە هۆی ناڕەزایەتی خەڵک.

بە هەوڵی چالاکوانانی خەڵکی شنۆ ئێستا رێوڕەسمی چوارشەممە سووری بووەتە تەنیا یەک رۆژ و ئەو چالاکانە داوا لە خەڵک دەکەن لەو رۆژە و لە رۆژەکانی دیکەی ساڵی نوێیشدا یاری ئاگرینی مەترسیدار، دەستساز و ناستاندارد بەکارنەهێنن.

ئەمەش بزانە: چوارشەممە سووری، رێوڕەسمی پێشوازی لە نەورۆزە و لە ئێوارەی رۆژی دوایین سێشەممەی ساڵ کە بەیانییەکەی دەبێتە چوارشەممە خەڵک ئاگر دەکەنەوە و شایی دەکەن.