دراوە ئەلیكترۆنییەكانیش هاوشێوەی دراوی كاغەز زەكاتیان لێدەكەوێت؟

ئاڤا نیوز

 

شارەزایەكی دارایی ئیسلامی ڕوونكردنەوە سەبارەت بە زەكاتی دراوە ئەلیكترۆنییەكان دەدات و باس لەوەش دەكات كە لە جیهانی ئیسلامیدا دوو ڕا هەیە: بەشێكیان دەڵێن، وەبەرهێنان لەو جۆرە دراوانەدا شەرعییە و بەشەكەی دیكەشیان دەڵێن: ناشەرعییە.

 

وێنە گەورەكە: زەكات ڕوكنی سێیەمی ئایینیی ئیسلامە و خودای گەورە لەسەر پەیڕەوانی ئایینەكەی سەپاندووە كە دەبێت زەكات بدەن، لە ناوەڕۆكی قورئان و لە فەرموودەكانی پێغەمبەری ئیسلام، محەممەد (درودی خوای لەسەر بێت) مەرج و ڕێنماییەكانی تایبەت بە زەكات ڕوونكراوەتەوە، بەڵام ئەوەی لەم سەردەمەدا كەمترین قسەی لەسەر كراوە شێوازی زەكاتی دراوە ئەلیكترۆنییەكانە، ئاڤا میدیا لەڕێگەی پسپۆرێكی بوارەكەوە بابەتەكە ڕوون دەكاتەوە.

 

لێدوانی فەرمی: د. شكار هەڵەبجەیی، شارەزای دارایی ئیسلامی سەبارەت بە زەكاتی دراوە ئەلیكترۆنییەكان بە ئاڤا میدیای ڕاگەیاند: لەو بابەتەدا زەكاتی زێڕ دەكرێتە پێوەر، هاوكات بۆ دراوە كاغەزی و بانكییەكانیش زێڕ كراوەتە پێوەر و ئەوانیش زەكاتیان لێدەكەوێت، بەر لەوەی باس لە زەكاتی دراوە ئەلیكترۆنییەكان بكەین، دەبێت باس لە شەرعیبوون و شەرعینەبوونی خودی پرۆسەكە بكەین.

 

زانیاریی زیاتر: "بەشێك لە زاناكانی ئایینی ئیسلام بڕوایان وایە كە بازاڕی دراوە ئەلیكترۆنییەكان، بازاڕێكی شەرعی نییە بۆ وەبەرهێنان، كەواتە بەپێی ئەو ڕایە، دەبێت ڕاستەوخۆ لە بازاڕەكە بكشێیتەوە و قازانجەكەشی بەلاوە بنێی، بەڵام زەكاتی پارەكە هەر دەمێنێتەوە."

 

ئەوەی پێویستە بیزانیت: ئەو شارەزایەی دارایی ئیسلامی دەشڵێت: "بەشێكی دیكە لە زانایان ڕایان وایە كە دراوە ئەلیكترۆنییەكانیش زەكاتی لێدەكەوێت، بەڵام لە هەردوو حاڵەتەكەدا زەكاتەكەی %2.5. سەبارەت بە پای، ئەگەر بەپێی ئەو ڕایە بكرێت كە دەڵێ دروستە، ئەوا دەبێت بە هەمان شێوە زەكاتی لێبدرێت بە مەرجێك ساڵێكی بەسەردا تێپەڕیبێت".