عێراق داوای ڕانەگرتنی هاوکارییەکان لە ئەمریکا دەکات

ئاڤا نیوز

ڕاوێژکاری ئاسایشی نیشتمانی و ژمارەیەک وەزیری عێراق داوایان لە ئەمریکا کردووە، بە بڕیاری ڕاگرتنی هاوکارییەکانی بۆ ڕێکخراوە نێودەوڵەتییەکان لە عێراق بچێتەوە.

وێنە گەورەکە: ئەم داوایە لە کاتێکدایە، ئەنتۆنیۆ گۆتێرێس لە نامەیەکیدا بۆ محەمەد شیاع سودانی سەرۆکوەزیرانی عێراق دۆخی سەنتەری ئەمەل و کەمپی هۆل و ئەو خێزانە عێراقییانەی لە باکووری ڕۆژهەڵاتی سووریا دەگەڕێنەوە خستووەتەڕوو، چونکە ئەمریکا لەم نێوەندەدا هاوکارییەکانی بۆ نەتەوەیەکگرتووەکانیش لە عێراق ڕاگرتووە.

زانیاریی تایبەت: بەرپرسێکی ئاگادار لە گفتوگۆکان ڕایگەیاندووە، ڕاگرتنی هاوکارییەکان ڕاستەوخۆ کاردەکاتە سەر هاوکارییە مرۆییەکان و دووبارە ڕاهێنانەوەی ئەو خێزانە عێراقییانەی لە کەمپەکاندان.

ئەوەی پێویستە بیزانیت: لە گفتوگۆکاندا تیشک خراوەتەسەر وەڵامدانەوەی کۆمەڵگەی نێودەوڵەتی بۆ تەواوکردنی قۆناغی دووەمی فایلی داعش، بە تایبەت ڕاهێنانەوەی ئەو خێزانانەی کاریگەریی جەنگیان بەهۆی داعشەوە لەسەر دروستبووە.

زانیاریی زیاتر: هاوکارییەکانی ئەمریکا بۆ عێراق لە ساڵی 2024، زیاتر لە 333 ملیۆن دۆلار بووە، بەڵام لە ساڵی 2025، هاوکارییەکان کەمیکردووە و ئەمریکا بە بەهای نزیکەی 10 ملیۆن دۆلار هاوکاری بە عێراق داوە.