لە سلێمانی فاسۆلیای تەڕ قەدەغە دەكرێت

ئاڤا نیوز

بە هۆی بڵاوبوونەوەی جۆرە نەخۆشییەك، قایمقامییەتی قەزای ناوەندی سلێمانی هاوردەكردن و فرۆشتنی فاسۆلیای تەڕ قەدەغە دەكات.

چیرۆكی سەرەكی: ئەمڕۆ پێنجشەممە 13-3-2025، قایمقامییەتی قەزای ناوەندی سلێمانی چەند بڕیارێكی سەبارەت بە هاوردەكردنی سەوزە و میوە دا، لەمەودوا تەنیا ڕێگە بە هاوردەكردنی ئەو بەرهەمانە دەدرێت كە هێشتا لەناوخۆ پێ نەگەیشتوون.

ڕاگەیێنراوی فەرمی: ئاوات محەممەد، قایمقامی قەزای ناوەندی سلێمانی ڕایگەیاند:

- دەبێت لەمەودوا هاوسەنگی لەنێوان بەرهەمی سەوزە و میوەی ناوخۆ و هاوردەكراودا ڕابگیرێت، بەتایبەت كە لەم وەرزەدا بەرهەمەکانی ناوخۆ بەتەواوەتی پێ نەگەیشتوون، بۆیە ڕێگە دەدرێت بە هاوردەکردنی چەند جۆرێک سەوزە و میوە بە پێی پێویست بە مەرجێک بەشێوەیەکی تەندروست و لەژێر چاودێریدا هاوردە بکرێت.

- جەختی لە قەدەغەی هاوردەکردن و ساغکردنەوەی فاسۆلیای تەڕ کردەوە كە ئێستا بە هۆی بڵاوبونەوەی جۆرە نەخۆشییەک هاوردەکردنی ڕاگیراوە، لیژنە هاوبەشەكانیش ڕادەسپێرێت كە لە هەر شوێنێکی میوە فرۆشیدا فاسۆلیای تەڕیان بینی دەسبەجێ دەستی بەسەردا بگرن و لەناوی ببەن.