چەند مەیموونێک خەڵکی گەڕەکێکی هەولێر هەراسان دەکەن

ئاڤا نیوز

ماوەیەکە ژمارەیەک مەیموون لە گەڕەکی منارەی چۆڵی لە شاری هەولێر بەرەڵا بوونە و هەڵدەکوتنە سەر ماڵان و خەڵکەکەیان هەراسان کردووە. 

وێنە گەورەکە: چەند مانگێکە چوار مەیموونی بەرەڵا دانیشتوانی گەڕەکی منارەی هەولێریان بێزار کردووە، ژن و منداڵ دەترسێنن و دزی دەکەن و پەلاماری ئەو کاسبکارە گەڕۆکانە دەدەن کە لە کۆڵان و گەڕەکەکان سەوزە و میوە دەفرۆشن، بە تایبەت ئەوانەی مۆز دەفرۆشن.

لێدوانە فەرمییەکان:

- میوە فرۆشێک دەڵێت، "جارێکیان یەکیک لەو مەیموونانە پەلاماریدام و سێ کیلۆ مۆزی خوارد".

- گەنجێکیش دەڵێت، "یەکێک لەو مەیموونانە هەموو ڕۆژێک دەهاتە سەر دیواری ماڵەکەمان، منیش ڤیدیۆم دەگرت و لە تیکتۆک بڵاوم دەکردەوە،  لە سایەی ڤیدیۆی مەیموونەکە ڤیوی تیکتۆکەکەم زۆر بەرز دەبووەوە".

- دانیشتوانی گەرەکە دەڵێن، ئەم مەیموونانە دزیش دەکەن، ئاڵتوونیان لە ماڵێک دزیوە، تاکە پێڵاوی مام حاجییەکیشیان بردووە کە بووە بە باس و خواسی گەڕەک.

ئەوەی پێویستە بیزانیت: ئەم مەیموونانە لە مانگی شەشی ساڵی ڕابردووەوە لە منارەن، تاوەکو ئێستا هیچ کەس ئەزیەتیانی نەداون، مەیموونەکانیش کەس ئەزیەت نادەن.

لەلایەکی دیکەوە: هەندێک خەڵکی دیکە داوای دەستگیرکردنی ئەو مەیموونانە دەکەن و دەڵێن، "لە نیوە شەودا زۆر جار هەڵدەکوتنە ماڵان و پەلامارمان دەدەن". هاوکات هەندێک خەڵکی دیکە داوا دەکەن بمێننەوە، چونکە خەڵک کەیف و خۆشیان لەگەڵ دەکەن.

بە تەنیشت ئەم بابەتە: شاخەوان سەعید، گوتەبێژی بەرگریی شارستانیی هەولێر  دەڵێت:

- ئەم بابەتە پێشتر لەگەڕەکی 32 پارک ڕوویداوە و کۆمەڵێک مەیموون پەیدا ببوون، پەنجەرەی چەند ماڵێکیشیان شکاندبوو.

 - بەرگری شارستانی هەوڵی دەستگیرکردنی ئەو مەیموونانەی دا، بەڵام هەوڵەکە شکستی هێنا و دیار نەمان، لەوانەیە هەر هەمان ئەو مەیموونانە بن کە ئێستا لە گەڕەکی منارەن.

- خەڵکی گەڕەکی منارە تاوەکو ئێستا سکاڵایان تۆمار نەکردووە تاوەکو بەدواداچوون بکەین.