تیمی پڕۆژەی ڕووناکی خاوەن مۆلیدەی گەڕەکەکان قەرەبوو دەکاتەوە

ئاڤا نیوز

 

لەگەڵ جێبەجێکردنی پڕۆژەی ڕووناکی لە شاری هەولێر، تاوەکو ئێستا نزیکە 400 مۆلیدەی ئەهلی بە تەواوی کوژێنراونەتەوە، تیمی پڕۆژەی ڕووناکی دەیەوێت لەڕێگەی ڕێککەوتنێکەوە قەرەبووی ئەو خاوەن مۆلیدانە بکاتەوە.

 

وێنە گەورەکە: پڕۆژەی ڕووناکی ئامانجی دابینکردنی کارەبای 24 کاتژمێرییە بۆ تەواوی هەرێمی کوردستان، ئێستا لە پارێزگای هەولێر و سلێمانی و دهۆک دەستکراوە بە جێبەجێکردنی، ئەمەش کاریگەریی بەرچاوی دەبێت لەسەر پاک ڕاگرتنی ژینگەی هەرێمی کوردستان بەهۆی کوژراندنەوەی مۆلیدە ئەهلییەکانەوە. 

 

زانیاریی زیاتر: لەگەڵ جێبەجێکردنی پڕۆژەی ڕووناکی لە هەولێر تاوەکو ئێستا 400 مۆلیدە کوژێنراونەتەوە و بەهۆی فروانکردنی پڕۆژەکەشەوە مۆلیدەی زۆرینەی شوێنەکان دەکوژێندرێنەوە. 

 

زانیاریی بەدەستهاتوو: بە گوێرەی بەدواداچوونی ئاڤا، تیمی پڕۆژەی ڕووناکی ڕێککەوتن لەگەڵ خاوەن مۆلیدەی گەڕەکەکان دەکەن، بەهۆی ئەوەی زیانیان بەرکەوتووە و تاوەکو مۆلیدەکانیشیان هەڵنەگرنەوە لەکاتی پێویست وەکو پاڵپشتی بەکاربهێنرێن، بەڵام ئەو بڕە پارەی پێیان دەدرێت 10 قات کەمترە بەراورد بەکاتی کارپێکردنی مۆلیدەکان.