پوتن بە پێشنیازەکەی ترەمپ بۆ ئاگربەست گەشبینە

ئاڤا نیوز

کۆشکی کرێملن ڕایگەیاند، ڤلادیمێر پوتن، سەرۆکی ڕووسیا نامەیەکی بۆ دۆناڵد ترەمپ هاوتا ئەمریکییەکەی سەبارەت بە پێشنیازی واشنتن بۆ ئاگربەست لە ئۆکراینا ناردووە و تێیدا گەشبینی خۆی دەربڕیوە.

چیرۆکی سەرەکی: ئەمریکا داوای ئاگربەستی دەستبەجێی نێوان ڕووسیا و ئۆکراینای کرد و فشارێکی زۆری خستە سەر ڤۆلۆدیمیر زێلێنسکی، سەرۆکی ئۆکراینا، کە دواجار ڕۆژی سێشەممە ڕازی بوو بۆ وەستاندنی شەڕ و پێکدادانەکان بۆ ماوەی 30 ڕۆژ، بە مەرجێک ڕووسیاش پابەند بێت.

لێدوانە فەرمییەکان:

٠ دۆناڵد ترەمپ، سەرۆکی ئەمریکا ڕایگەیاندووە، پێویستە ڤلادیمێر پوتن ، ژیانی هەزاران سەربازی ئۆکراینا بپارێزێت لەو بەرەیەدا، کە سوپای ڕووسیا بەردەوامە لە پێشڕەوی، گوتیشی، گفتوگۆیەکی زۆر باش و بەرهەمداریان لەگەڵ پوتن هەبووە، هاوکات دەرفەتی گەورە هەیە بۆ کۆتاییهێنان بەم شەڕە ترسناک و خوێناوییە.

٠ دیمیتری پێسکۆڤ، وتەبێژی کۆشکی کرێملن پشتڕاستی کردەوە، سەرۆکی ڕووسیا لەڕێگەی ستیڤ ویتکۆف نوێنەری تایبەتی سەرۆکی ئەمریکا بۆ ڕۆژهەڵاتی ناوەڕاست پەیامی زیاتری بە دۆناڵد ترەمپ گەیاندووە و پێی وتووە بە پێشنیازەکەی ئەمریکا بۆ ڕاگرتنی شەڕ گەشبینە، هەر کاتێک پەیامەکان گەیشتنە سەرۆکی ئەمریکا، ئەو کات پەیوەندییەکی تەلەفۆنی لە نێوان ڤلۆدیمێر پوتن و دۆناڵد ترەمپ ئەنجام دەدەن.

٠ ئاندرێ سیبیها، وەزیری دەرەوەی ئۆکراینا ڕایگەیاند، دەبینین ڕووسیا دەیەوێت بەردەوام بێت لە دەستدرێژیەکانی و درێژەدان بە شەڕەکە، لە کاتێکدا ئۆکراینا بە ڕوونی بەڵێی بۆ ئاگربەست داوە.

زانیاریی زیاتر: پێدەچێت سەرۆکی ڕووسیا کاتی بوێت، لەکاتێکدا هێزەکانی لە پێشڕەوی کردن بەردەوامن و لە چەند ڕۆژی ڕابردووشدا ئەو ناوچانەیان لە ناوچەی کورسکی ڕووسیا کۆنتڕۆڵکردەوە، کە لە هاوینی ساڵی پارەوە لەلایەن ئۆکراینا کۆنتڕۆڵکرابوون.

ئەوەی پێویستە بیزانیت: دۆناڵد ترەمپ دەیەوێت مۆسکۆ بە زووترین کات شەڕەکان ڕابگرێت، ئەمەش دوای ئەوەی بەهۆی نزیکبوونەوەی لەگەڵ مۆسکۆ، کیێڤ و ئەوروپای توڕە کرد.