عێراق و سووریا ژووری ئۆپەراسیۆنی هاوبەش بۆ ڕووبەڕووبوونەوەی داعش پێکدەهێنن

 

ئاڤا نیوز

وەزیری دەرەوەی عێراق ئاشکرای دەکات، لەگەڵ هاوتا سوورییەکەی تاوتوێی پێکهێنانی ژووری ئۆپەراسیۆنی هاوبەش بۆ ڕووبەڕووبوونەوەی داعشیان کرد.

چیرۆکی سەرەکی: دوای نیوەڕۆی ئەمڕۆ هەینی، ئەسعەد شەیبانی، وەزیری دەرەوەی سووریا بە سەردانێکی فەرمی گەیشتە بەغدا و لە لایەن فوئاد حوسێن وەزیری دەرەوەی عێراق پێشوازیی لێکرا، دوای کۆبوونەوەیان کۆنگرەیەکی ڕۆژنامەوانیی هاوبەشیان ئەنجامدا.

ڕاگەیێنراوی فەرمی: فوئاد حوسێن، وەزیری دەرەوەی عێراق لە کۆنگرەیەکی ڕۆژنامەوانی ڕایگەیاند:

٠ هەڕەشەی هاوبەش لەسەر کۆمەڵگەی سووریا و عێراقدا هەیە بە تایبەتی ڕێکخراوی داعش، بۆیەش تاوتوێی دروستکردنی ژووری هاوبەشی ئۆپەراسیۆنەکانمان بۆ ڕووبەڕووبوونەوەی داعش کرد.

٠ ئەزموونی عێراق سوودی بۆ سووریا دەبێت لە بواری ئاسایشەوە، ئێمە پێشتر جەنگی تائیفییمان هەبوو و تاوەکو ئێستاش کاریگەریی لەسەر کۆمەڵگەی عێراقی ماوە، لەم سۆنگەیەوە گفتوگۆمان کرد دەربارەی ڕووداوەکانی کەناراوەکانی سووریا و ئەوەی بەرامبەر عەلەوییەکان کرا و نیگەرانیی خۆمان لەمبارەیەوە دەربڕی.

٠ ژووری ئۆپەراسیۆنە هاوبەشەکانی نێوان عێراق، تورکیا، سووریا، ئوردن و لوبنان بەم زووانە دەست بەکارەکانی دەکات. 

٠ ڕێککەوتنی نێوان سەرۆک ئەحمەد شەرع و مەزڵووم عەبدی گرنگە و ئومێدەوارین لە بەرژەوەندیی سووریا جێبەجێبکرێت.

زانیاریی زیاتر: شەیبانی دوای کۆبوونەوەی لەگەڵ هاوتا عێراقییەکەی لەگەڵ محەممەد شیاع سوودانی، سەرۆکوەزیران و لەتیف ڕەشید، سەرۆککۆمار کۆبووەوە، دوای بەربانگیش لەگەڵ مەحموود مەشهەدانی، سەرۆکی پەرلەمانی عێراق کۆدەبێتەوە.

ئەوەی پێویستە بیزانیت: سەردانەکەی شەیبانی بە یەکەم سەردانی بەرپرسی باڵای سووریای دوای ڕوخانی دەسەڵاتی ئەسەد لە کۆتایی ساڵی ڕابردوو، دێت، کە بە فەرمی سەردانی عێراق بکات.

ئەمەش بزانە: بڕیارە لە کۆتایی مانگی ئایاری ئەمساڵ لووتکەی وڵاتانی عەرەبی لە بەغدا بەڕێوەبچێت، بە گوتەی وەزیری دەرەوەی عێراقیش بانگهێشتی تەواوی سەرکردەکانی وڵاتانی عەرەبی دەکەن، لەنێویشیاندا ئەحمەد شەرع.