ئێران: گەڕی نوێی سزاکانی ئەمریکا هەڕەشەن بۆ سەر ئاشتی و ئاسایشی جیهان

ئاڤا نیوز

 

وەزارەتی دەرەوی ئێران بەتووندی ئیدانەی گەڕی نوێی سزاکانی ئەمریکا بۆ سەر وڵاتەکەی دەکات و بە بەشێک لە سیاسەتی "دووڕوویی" ئەمریکا ناوزەند دەکات.

 

وێنە گەورەکە: لە کاتێکدا دۆناڵد ترەمپ، سەرۆکی ئەمریکا نامەی دەربڕینی ئامادەیی ئەمریکای بۆ دانوستاندن لەگەڵ ئێران بۆ ڕابەری باڵای وڵات ناردووە، وەزارەتی گەنجینەی ئەمریکا گەڕێکی نوێی سزاکانی بۆ سەر ئێران ڕاگەیاند و سزاکان موحسین پاکنەژاد، وەزیری نەوتی ئێران و ژمارەیەک کۆمپانیا و کەشتی گواستەوەی نەوتی خاوی ئێران دەگرێتەوە، وەزارەتی دەرەوی ئێرانیش ئەم سیاسەتەی ئەمریکا بە سیاسەتی دژیەکی و دووڕوویی ناوزەند دەکات.

 

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران ڕایگەیاند، سزاکانی وەزارەتی گەنجینەی ئەمریکا پێچەوانەی بانگەوازی دۆناڵد ترەمپ، سەرۆکی ئەمریکایە بۆ ئەنجامدانی گفتوگۆ و دانوستاندن لەگەڵ ئێران و بەشێکە لە سیاسەتی "دووڕوویی" ئەمریکا.

 

زانیاریی زیاتر: "گەڕی نوێی سزاکانی ئەمریکا فشار و دژایەتی ئەمریکایە بۆ سەر وڵاتانی سەربەخۆ و پێشێلکاری دژ بە یاسایە لە ئاستی نێودەوڵەتیدا و، هەڕەشە و مەترسییەکان بۆ سەر ئاسایش و ئاشتی نێودەوڵەتی زیاتر دەکات".

 

ئەوەی پێویستە بیزانیت: دۆناڵد ترەمپ، سەرۆکی ئەمریکا لە دوایین چاوپێکەوتنی ڕۆژنامەوانیدا، لە ئەگەری ڕازینەبوونی تاران بە دانوستاندن لەسەر بەرنامەی ئەتۆمی هەڕەشەی بەکارهێنانی هێزی سەربازی دژ بە ئێران کرد.