ماکرۆن سەردانی عێراق دەکات

 

ئاڤا نیوز

محەممەد شیاع سوودانی و ئیمانوێل ماکرۆن، ڕێککەوتن لەسەر ڕاسپاردنی تیمێک بۆ دیاریکردنی وادەی سەردانی سەرۆکی فەرەنسا بۆ بەغدا لە ماوەی داهاتوودا.

چیرۆکی سەرەکی: ڕۆژی شەممە، سەرۆکوەزیرانی عێراق و سەرۆکی فەرەنسا لە پەیوەندییەکی تەلەفۆنییدا  جگە لە سەردانی سەرۆکی فەرەنسا بۆ عێراق، چەندین پرسی هاوبەش و ناوچەییان تاوتوێ کرد، لەوانەش؛ پرسی سووریا، جەنگی لوبنان و غەززە و مەلەفی ئێران.

ڕاگەیێنراوی فەرمی: نووسینگەی ڕاگەیاندنی سەرۆکی ئەنجوومەنی وەزیرانی عێراق لە ڕاگەیێنراوێکدا ڕایگەیاند: سەرۆکوەزیران دووپاتیکردەوە عێراق بەپەرۆشە بۆ پاراستنی پەیوەندییە دووقۆڵییەکان و بەرزکردنەوەی هاوکارییەکان لەبوارە جیاوازەکاندا، بەتایبەتی لە بوارەکانی ئابووری و ڕۆشنبیری.

لە لایەکی دیکەوە: ئیمانوێل ماکرۆن، سەرۆکی فەرەنسا، ویستی وڵاتەکەی بۆ درێژەدان بە هاوکاری لەگەڵ عێراق لە بوارە جیاجیاکاندا دووپاتکردەوە و جەختی لەسەر ئامادەیی فەرەنسا بۆ هەماهەنگی لەگەڵ عێراق لە شەڕی دژ بە تیرۆر کردەوە.