چەند پەیامێک لە مەسرور بارزانی و بافڵ تاڵەبانییەوە

ئاڤا نیوز

 

دوای کۆبوونەوەیان لەبارەی پێکهێنانی حکومەت و دابەشکردنی پۆستەکان، سەرۆکوەزیران مەسرور بارزانی و بافڵ تاڵەبانی، سەرۆکی یەکێتیی نیشتمانیی کوردستان چەند پەیامێکیان ئاراستەی خەڵكی کوردستان کرد.

چیرۆکی سەرەکی: پاش نیوەڕۆی ئەمڕۆ یەکشەممە لە پیرمام، سەرۆکوەزیران مەسرور بارزانی پێشوازی لە بافڵ تاڵەبانی، سەرۆکی یەکێتیی نیشتمانی کوردستان کرد و گفتوگۆکرا لەبارەی پێکهێنانی کابینەی نوێی حکومەتی هەرێمی کوردستان و هەردوولا کۆبوونەوەیەکەیان بە ئەرێنی وەسفکرد.

 

لێدوانی فەرمی: سەرۆکوەزیران مەسرور بارزانی ڕایگەیاند، بەخێرهاتنی بافڵ تاڵەبانی دەکەم، کۆبوونەوەیەکی ئەرێنی و زۆرباشمان کرد، بۆ لێک نزیکبوونەوە و تاوتوێکردنی ئەو بابەتانەی پەیوەستن بە خەڵکی هەرێمی کوردستان و ناوچەکە، پێشکەوتنی زۆر باشمان هەبووە، هیوادارین تیمەکانیش بەو ڕۆحیەتە بتوانن بگەنە پێکهێنانی حکومەت و دڵی خەڵک خۆش بکەن.

 

لەلایەکی دیکەوە: بافڵ تاڵەبانی ڕایگەیاند، کۆبوونەوەکەمان زۆر زۆر باشبوو، لەسەر چەند شتێکی ستراتیژی پەیوەست بە خەڵک قسەمان کرد و ڕێککەوتووین و گفتوگۆکانیشمان بەردەوام دەبێت. ئامانجی هەردووکمان ئەوەیە بەزووترین کات حکومەتی نوێ پێکبهێنین بۆ خزمەتی گەلەکەمان."

 

زانیاریی زیاتر: لە کۆتاییدا بافڵ تاڵەبانی بە سەرۆکوەزیران مەسرور بارزانی گوت: "لە نزیکترین کاتتدا دەتبینمەوە"