وەزارەتی دارایی داهاتی ناوخۆی مانگی دووی بۆ بەغدا نارد

ئاڤا نیوز

 

وەزارەتی دارایی و ئابووری هەرێمی کوردستان بڕێکی دیکەی لە داهاتی نانەوتی لە مانگی دووی خستووەتەسەر هەژماری بانکی وەزارەتی دارایی عێراق.

وێنە گەورەکە: ڕادەستکردنی 50%ی داهاتی نانەوتی ناوخۆی هەرێمی کوردستان بە بەغدا، یەکێکە لە خاڵەکانی ڕێککەوتنی ئەمساڵ بۆ ناردنی مووچەی، لەماوەی ڕۆژانی ڕابردووش بڕی 51 ملیار و 895 ملیۆن دینار وەکو داهاتی مانگی یەک بۆ بەغدا نێردرا.

ڕاگەیێنراوی فەرمی: وەزارەتی دارایی و ئابووری هەرێمی کوردستان لە ڕاگەیێنراوێکدا ئاماژە بەوەدەدات، 48 ملیار و 722 ملیۆن و 239 هەزار دینار بەشێوەی کاش خراوەتە سەر هەژماری بانکی وەزارەتی دارایی حکومەتی فیدراڵ لەلقی هەولێری بانکی ناوەندی عێراق.       

 

باکگراوند: بەپێی ڕێكکەوتنی نێوان هەولێر و بەغدا، دەبێت هەرێمی کوردستان مانگانە لەسەدا 50ی داهاتی نانەوتی ڕەوانەی بەغدا بکات، دوای هەموو 10ی مانگێکیش دەبێت تەرازووی پێداچوونەوەی مانگی پێشتر ئامادەبکات و ڕەوانەی بەغدای بکەن.