فایلی خەڵک؛ لێبڕینی مووچەی خانەنشینی سەربازی سلێمانی دەگەڕێنرێتەوە

ئاڤا نیوز

خانەنشینە پلە تایبەتەکانی سەربازی لە سنووری سلێمانی نیگەرانن لەوەی دوو مانگە مووچەکانیان بە لێبڕێنەوە وەردەگرن، سەرچاوەیەک لە بەڕێوەبەرایەتی گشتیی خانەنشینی هەرێمیش دەڵێت 'مووچەکانیان چاککراوە'.

چیرۆکی سەرەکی: دوو مانگە خانەنشینە پلە تایبەتەکانی سنووری سلێمانی مووچەکانیان بە لێبڕێنەوە وەردەگرن، وەک خۆیان دەڵێن پێشتر بەڵێنی چارەسەرکردن و گەڕانەوەی لێبڕینی مووچەکانیان پێدراوە، بەڵام جێبەجێ نەکراوە.

زانیاریی تایبەت: سەرچاوەیەک لە بەڕێوەبەرایەتی گشتیی خانەنشینی هەرێمی کوردستان، بە ئاڤا میدیای ڕاگەیاند: لەگەڵ بەڕێوەبەرایەتی خانەنشینی پێشمەرگەی سلێمانی قسەمان کردووە، ئەو جیاوازی و لێبڕینەی لە مووچەی مانگی یەک و دوو کرابوو بۆیان چاککراوە، ئەو لێبڕێنەش کە لە مووچەکەیان کرابوو بۆیان بەستراوەتەوە.

زانیاریی زیاتر: سەرچاوەکەی بەڕێوەبەرایەتی گشتیی خانەنشینی وتیشی: ئەو خانەنشینانە مووچەی مانگی سێیان بە چاککراوی وەردەگرن.