تەقینەوەی پاشماوەکانی جەنگ سەدان هاووڵاتی سووریا دەکوژێت

 

ئاڤا نیوز

لەماوەی 3 مانگی دوای کەوتنی ڕژێمی ئەسەد لە سووریا، 640 کەس بەهۆی تەقینەوەی پاشماوەکانی جەنگەوە گیانیان لەدەستداوە.

چیرۆکی سەرەکی: هەزاران مین و گولە و تەقەمەنی نەتەقیو لە سەرانسەری سووریادا بڵاوبوونەتەوە، کە لە ماوەی 14 ساڵدا شاهیدی ئۆپەراسیۆنی سەربازی و بۆردوومان بوون.

ڕاگەیێنراوی فەرمی: ڕێکخراوی خێرخوازی مین هالۆ تراست ڕایگەیاندووە، زۆربەی ئەو کەسانەی بەهۆی پاشماوەی جەنگەوە لە سووریا دەبنە قوربانی منداڵانن، چونکە هەندێکجار بە هەڵە بە یاری دەزانن. گوتیشی تا هەفتەی ڕابردوو 640 کەس بەهۆی پاشماوەی جەنگەوە کوژراون و برینداربوون.

ئەوەش بزانە: بەپێی داتاکانی تۆڕی سووریا بۆ مافی مرۆڤ، لانیکەم سێ هەزار و 521 کەسی مەدەنی لە ئەنجامی تەقینەوەی مین لە نێوان ئازاری 2011 تا کۆتایی ساڵی 2024 تۆمارکراون، کە 931 منداڵ و 362 ژنیان تێدا بووە، جگە لە حەوت کارمەندی بەرگریی شارستانی و هەشت کارمەندی پزیشکی و نۆ کارمەندی دەزگاکانی ڕاگەیاندن.