مامەڵەی سێ هەزار خانەنشین تەواو بووە و ئەم مانگە سێ مووچەیان پێ دەدرێت

ئاڤا نیوز

ئاڤا زانیاریی نوێ لەبارەی بەستنی مووچە و ئیکرامیەی خانەنشینی بڵاودەکاتەوە، ئێستا مامەڵەی نزیکەی سێ هەزار خانەنشین تەواو بووە و ئەم مانگە مووچەی سێ مانگی خانەنشینییان وەردەگرن.

وێنە گەورەکە: ئەو خانەنشینانەی سەرەتای ئەمساڵ بەکۆمەڵ خانەنشینکران، ئەوانەی لە ساڵانی 1961، 1963،1962لەدایکبوون و ئەوانەی ئەمساڵیش کە لە ساڵی 1964 لەدایکبوون تەمەنیان دەگاتە 60 ساڵ و خانەنشین دەبن، بەگشتی ژمارەیان زیاتر لە 25 هەزار کەسە.

ئەوەی پێویستە بیزانیت: تاوەکو ئێستا مامەڵەی نزیکەی سێ هەزار کەسیان تەواو بووە، ئەم مانگە مووچەیان بۆ دەبەسترێت و سێ مووچە بەیەکەوە وەردەگرن.

زانیاریی تایبەت: سەرچاوەیەک لە بەڕێوەبەرایەتیی گشتیی خانەنشینی هەرێمی کوردستان بە ئاڤا میدیای ڕاگەیاند،

- دۆسیەی سەرجەم خانەنشینانی لەدایکبووی 1961 تەواو بووە، هاوکات دۆسیەی خانەنشینانی لەدایکبووی 1962 و 1963 و 1964 ئەوانەی فایلەکانیان زوو تەواو کراوە نێردراوە بۆ خانەنشینی و داخلی لیستی مووچە کراوە. هەروەها ئەوانی دیکەش دەکەوێتە مانگی چوار و مانگەکانی دواتر.

- بۆ سەرجەمیان تەرخانی دارایی کراوە، مانگانە لیستی خانەنشینانی نوێ بۆ بەغدا دەنێردرێت و هەر کاتێک مووچەیان بۆ بەسترا، سەرجەم مووچەکانی ڕابردوویان وەردەگرن.

- لەبارەی وەرگرتنی 18مووچەکەش بۆ ئەو کەسانەی 25 ساڵ خزمەت و 180 ڕۆژ مۆڵەتی کۆکراوەیان هەیە، 12 مووچەی تەواو بەغدا دەیدات و شەش مووچەکەی دیکەش حکومەتی هەرێمی کوردستان دەیدات، ئەوەی بەغدا دەکەوێتە سەر وەزارەتی دارایی عێراق، کەی پارەی بەردەست هەبوو تەرخانی دارایی دەکات و دواتر لە بانکەکان ئەو بڕەش وەردەگرن، بەڵام ڕەنگە بە یەکجار نەبێت و بە چەند پێشینەیەک بێت.

- لەبارەی شەش مووچە بنەڕەتییەکەش کە فەرمانگەکەی خۆی لە هەرێمی کوردستان پێیان دەدات، واتا لە کوێ دەوامیان کردووە، بەو مەرجەی 15 ساڵ خزمەتیان هەبێت لەگەڵ 180 ڕۆژ مۆڵەتی کۆکراوە.

ئەوەی لەوبارەیەوە دەگوترێت: کاتێک دۆسیەی خانەنشینێک لە بەڕێوەبەرایەتیی گشتیی خانەنشینی تەواو دەبێت، کۆپییەک لە نووسراوی فەرمی خانەنشینبوونی ڕەوانەی فەرمانگەکەی خۆی دەکرێتەوە، لەوێ لە بەشی ژمێریاری فەرمانگەکەی نووسراو دەکرێ بۆ بەڕێوەبەرایەتیی گشتیی ژمێرکاری هەرێمی کوردستان بۆ خەرجکردنی ئەو شەش مووچەیە بەردەوامە و نەوەستاوە، بەڵام هەندێکجار بەهۆی قەیرانی دارایی و نەبوونی پارە دوادەکەوێت.