ئێوارەی ئەمڕۆ لیستی مووچە ڕەوانەی بەغدا دەکرێت

ئاڤا نیوز

 

ئامادەکردنی لیستی مووچەی مانگی سێ، تەنیا چەند ڕێکارێکی وردی پێداچوونەوە و وردبینی ماوە و ئێوارەی ئەمڕۆ شاندێکی تەکنیکی وەزارەتی دارایی لیستەکە لەگەڵ خۆیان دەبەنە بەغدا.

 

وێنە گەورەکە: حکومەتی هەرێمی کوردستان هەموو هەوڵێکی خۆی خستووەتە گەڕ بۆئەوەی بەر لە جەژن مووچەی مانگی سێ دابەشبکرێت، لە یەکەم هەنگاویشیدا داهاتی نانەوتی مانگی دووی ڕەوانەی بەغداکرد و ئەمڕۆش لیستی مووچەی مانگی سێ دەنێرێت بۆ وەزارەتی دارایی عێراق.

 

زانیاریی تایبەت: سەرچاوەیەکی باڵا لەوەزارەتی دارایی و ئابووری هەرێمی کوردستان بە ئاڤا میدیا ڕاگەیاند، "لیستی مووچەی مانگی سێ کە بە سیستەمی پەیڕۆل ئامادە کراوە لە تەواوبووندایە، تەنیا چەند وردبینی و پێداچوونەوەیەکی کەمی ماوە، ئەمڕۆ ئەو وردبینییانە تەواودەبن و شاندێکی تەکنیکی کە هەریەک لە بەڕێوەبەری گشتی بوودجە و بەڕێوەبەری گشتی ژمێرکاری هەرێمی کوردستانی تێدایە دەچێتە بەغدا و لیستەکە ڕادەستی وەزارەتی دارایی حکومەتی فیدرالی دەکەن".

 

سەرچاوەکەی وەزارەتی دارایی گووتیشی، "لە لیستی مانگی سێدا هیچ کەموکوڕییەک نییە و بەو جۆرە ئامادەکراوە کە وەزارەتی دارایی عێراق دەیەوێت، شاندی تەکنیکیش دەچنە بە‌غدا بۆ وەڵامدانەوەی هەر پرسیارێک کە لەسەر لیستەکە هەبێت".

 

ئەمەش بزانە: ڕۆژی دووشەممە 19-03-2025 وەک یەکەم هەنگاوی پابەندییەکانی هەرێمی کوردستان بە ڕێککەوتنی لەگەڵ بەغدا، وەزارەتی دارایی هه‌رێمی كوردستان، بڕی 48 ملیار و 722 ملیۆن و 239 هەزار دینار داهاتی نانه‌وتیی مانگی شوباتی بەشێوەی کاش خسته‌ سەر هەژماری وەزارەتی دارایی عێراق.

.