تورکیا: هێرشەکانی ئیسرائیل پێشێلی یاسا نێودەوڵەتییەکانە و جێگای قبوڵ نییە

ئاڤا نیوز

وەزارەتی دەرەوەی تورکیا، لە ڕاگەیێنراوێکدا سەرکۆنەی هێرشەکانی ئیسرائیل بۆ سەر غەززە دەکات و بە پێشێلکردنی یاسا نێودەوڵەتییەکان و مافی مرۆڤ ناودەبات و دەڵێت: جێگای قبوڵ نییە.

 

ڕاگەیێنراوی فەرمی: وەزارەتی دەرەوەی تورکیا، ڕاگەیێنراوێکی فەرمی لەبارەی هێرشەکانی بەرەبەیانی ئەمڕۆی ئیسرائیل بۆ سەر کەرتی غەززە بڵاوکردەوە و ڕایگەیاندووە:

 

- ئیسرائیل بە پێشێل کردنی یاسای نێودەوڵەتیی و بەها جیهانییەکان بە قورسترین شێوە، هەڕەشە لە مرۆڤایەتی دەکات.

-ئەو کردەوە شەڕانگێزییەی حکومەتی ئیسرائیل نمايشی دەکات، هەڕەشە لە داهاتووی هاوبەشی ناوچەکە دەکات، جێگەی قبوڵ نییە ئیسرائیل ببێتە هۆی دووبارە سەرهەڵدانەوەی توندووتیژی لە ناوچەکەدا.

- کۆمەڵکوژی سەدان هاووڵاتی فەڵەستینی لەو هێرشانەی بەرەبەیانی ئەمڕۆ ئیسرائیل کردییە سەر غەززە، نیشانیدا کە ئەو سیاسەتی جینۆسایدەی حکومەتەکەی سەرۆکوەزیرانی ئیسرائیل، بنیامین نەتانیاهۆ، پەیڕەوی دەکات چووەتە قۆناغێکی نوێوە.

-پێویستە کۆمەڵگەی نێودەوڵەتیی هەڵوێستێکی پێداگرانەی هەبێت بەرامبەر ئیسرائیل بۆ دەستەبەرکردنی ئاشتیی بەردەوام لە غەززە و گەیاندنی هاوکاريیە مرۆییەکان.

-وەک تورکیا بەردەوام دەبین لە پشتیووانی کردنی دۆزی ڕەوای گەلی فەڵەستین و جارێکی دیکە جەخت لەسەر پشتیووانی هەوڵەکان دەکەینەوە بۆ ئاشتیی و سەقامگیریی لە ناوچەکەدا.