سەدر هۆشداریی دەدات؛ ئیسرائیل دەگاتە سنووری عێراق

 

ئاڤا نیوز

ڕێبەری باڵای بزووتنەوەی نیشتمانیی شیعە هۆشداریی دەدات، دۆخی ئێستا دەبێتە هۆی ئەوەی جارێکی دیکە فەلەستین بفرۆشرێتەوە و ئیسرائیل فراوان دەبێت تا ئەوەی دەگاتە سنووری عێراق.

وێنە گەورەکە: گرژی و ئاڵۆزییەکان لە ناوچەکەدا دووبارە بوونەتەوە، ئەمریکا هێرشی کردە سەر حووسییەکان لە یەمەن، لە لایەکی دیکەوە ئیسرائیل ئاگربەستی لەگەڵ حەماس لە کەرتی غەززە کۆتایی پێ هێنا و بۆردوومانی قورسی کەرتەکەی دەستپێکردەوە، بەهۆی ئەو هێرشانەوە زیاتر لە هەزار کەس کوژران یان و بریندار بوون کە بەشێكی زۆریان ژن و منداڵن.

ڕاگەیێنراوی فەرمی: موقتەدا سەدر، ڕێبەری بزووتنەوەی نیشتمانیی شیعە لە تۆڕی "ئێکس" ڕایگەیاند: ئێمە زانیومانە و هۆشداریمان داوە کە بارودۆخی غەززە و شوێنەکانی دیکە بەرەو کوێ دەڕوات، بوونی دوژمنی زایۆنی لە ناوچەکە ئەنجامی خراپی دەبێت.

- دۆخی ئێستا دەبێتە هۆی ئەوەی جارێکی دیکە فەلەستین بفرۆشرێتەوە بۆ ئەوەی زایۆنیزم بە ئاسانی و تەنانەت بە هاوکاری لێرە و لەوێشەوە بتوانێت فراوان ببێت بۆ ناو خاکی ئیسلامی و عەرەبییەوە پێش هەموو شتێک بگاتە سنوورەکانی عێراق، ئەوکات پەشیمانی سوودی نابێت.

زانیاریی زیاتر: بەرپرسێکی سەرایا سەلام، باڵی سەربازیی بزووتنەوەی نیشتمانیی شیعە ئاشکرای کردووە، سەدر ڕێنمایی لایەنگرانی کردووە، چەک لە ناوخۆ یان دەرەوە بەکار نەهێنن، چارەنووسی میللەت و گەلەکەی لەلایەن تاک و گرووپە چەکدارەکانەوە دیاری ناکرێن.

- ئەگەر عێراق هێرشی کرایە سەر، پێویستە بگەڕێنەوە بۆ حەوزەی ئایینی و مەرجەع و ڕوو لە گەندەڵکاران و ستەمکاران نەکەن.