سوودانی بەزمانی کوردی پەیامێک ئاراستەی گەلی کوردستان دەکات

ئاڤا نیوز

 

سەرۆکوەزیرانی عێراق بەبۆنەی هاتنەوەی جەژنی نەورۆز و سەری ساڵی کوردی، پەیامێکی بە زمانی کوردی بڵاوکردەوە کە تێیدا پیرۆزبایی ئاراستەی گەلی عێراق بە گشتی و گەلی کورد بەتایبەتی دەکات.

 

چیرۆکی سەرەکی: بەبۆنەی هاتنەوەی جەژنی نەتەوەیی و سەری ساڵی 2725ـی کوردی، محەممەد شیاع سوودانی، سەرۆکوەزیرانی عێراق پەیامێکی پیرۆزبایی بڵاوکردەوە و هیوای بەردەوامبوونی ئاسایش و سەقامگیری لە عێراق خواست.

 

ڕاگەیێنراویی فەرمی: محەممەد شیاع سوودانی، سەرۆکوەزیرانی عێراق لە پۆستێکی لە تۆڕی ئێکس پەیامێکی پیرۆزبایی بەبۆنەی هاتنەوەی جەژنی نەورۆز بە زمانی کوردی بڵاوکردەوە.

- گەرمترین پیرۆزبایی ئاڕاستەی ڕۆڵەکانی گەلی عێراق بەگشتی و گەلی کوردمان بەتایبەتی دەکەین، بەبۆنەی هاتنەوەی جەژنی نەورۆزەوە، خوای گەورە بە خێر و خۆشی بیگێڕێت و بەهیوای بەردەوام بوونی ئاسایش و سەقامگیری لە عێراقدا، کە بەهەوڵی هەموو پێکهاتەکانی گەلە تەباکەی بەرەو سبەینێیەکی گەشاوەتر دەڕوات.

 

- نەورۆز ئەو ڕۆژەیە کە پەیوەندی خۆشەویستی و چارەنووسی هاوبەش و مێژوویەکی مەزنمان بیردەخاتەوە، ئەمەش هەموو عێراقییەکان لە سەرانسەری وڵاتەکەماندا بەیەکەوە دەبەستێتەوە.

 

- هەموو ساڵێک عێراقمان لە خێر و خۆشیدا بێت.