عێراق لە پلەی 101ـی وڵاتان دێت لەڕووی ئاسوودەییەوە

 

ئاڤا نیوز

بەگوێرەی ڕاپۆرتی ساڵانەی "ئاسوودەیی" نەتەوە یەکگرتووەکان، عێراق لە پلەی 101ـی وڵاتانی جیهانی دایە، هاوکات لە پلەی هەشتەمی وڵاتانی عەرەبی دێت.

وێنە گەورەکە: لە ساڵی 2012ـەوە، "تۆڕی چارەسەرەکانی گەشەپێدانی بەردەوام"ـی سەر بە نەتەوەیەکگرتووەکان، ساڵانە ڕاپۆرتی خۆی سەبارەت بە ئاسوودەیی دانیشتوانی سەرجەم وڵاتان ئەنجامدەدات و ڕیزبەندی بۆ وڵاتان دەکات.

قووڵتر: بەگوێرەی ڕاپۆرتەکە، ڕیزبەندیی بۆ وڵاتان بەپێی چەندین پێوەرەوە دەکرێت، لەوانەش؛ کۆی بەرهەمی ناوخۆیی، تەمەنی تەندروستی پێشبینیکراو و بۆچوونی دانیشتوانی وڵاتان دەربارەی ڕادەی ئەو پشتیوانییە کۆمەڵایەتییەی کە هەستی پێدەکەن لە ئەگەری ڕوودانی کێشەیەکدا، ئازادییان لە بڕیاردانی پەیوەست بە ژیانی تایبەتی خۆیان، تێڕوانینیان بۆ ڕادەی گەندەڵی لە کۆمەڵگاکانیاندا و ئاستی بەخشندەیی خۆیان.

 

زانیاریی زیاتر: فیلەندا پلەی یەکەمی جیهانی بەدەستهێناوە، دوای ئەوە دانیمارک، ئایسلەندا، سوید، هۆڵەندا، کۆستاریکا، نەرویج، ئیسرائیل، لۆکسمبۆرگ و مەکسیک دێن، ویلایەتە یەکگرتووەکانی ئەمریکاش پلەی 24ـی بەدەستهێناوە.

تورکیا لە پلەی 94 دایە، ئێرانیش لە پلەی 99 و ئەفغانستان لە کۆتایی لیستەکەدا هاتووە، پێش ئەوەش لوبنان و لێسۆتۆ و سیرالیۆن دێن.

ئەمەش بزانە: لەسەر ئاستی وڵاتانی عەرەبی، ئیمارات یەکەمە و 21ـی جیهانییە، کوێت دووەمە و 30ـی جیهانی، سعوودیە سێیەم و 32ـی جیهانە، عوممان چوارەم و 52ـی جیهانە، بەحڕەین پێنجەم و 59ـی جیهانە، لیبیا شەشەم و 79ـی جیهانە، جەزائیر حەوتەم و 84ـی جیهانی و ئینجا عێراق هەشتەم و 101ـی جیهانە.