ڕووپێوێکی گشتیی لەسەر تەندروستی ئافرەتان و منداڵانی کوردستان و عێراق ئەنجامدەدرێت

ئاڤا نیوز

دەستەی ئاماری کوردستان بە هاوکاری ڕێکخراوی یونسێف، ڕووپێوێکی نوێ لەسەر ڕەوشی تەندروستی خێزانی کوردستان بەتایبەتی ئافرەتان منداڵان ئەنجام دەدات.

چیرۆکی سەرەکی:  پێنج ساڵ جارێک ڕووپێوێکی نوێ لەسەر ڕەوشی خێزان بە گشتیی لە سەرانسەری عێراق و هەرێمی کوردستان ئەنجامدەدرێت، بۆ زانینی تەندروستی خێزان و تەندروستی ئافرەتان و منداڵ بە تایبەتی، بڕیارە لە کۆتایی ئەم مانگە پڕۆسەکە دەستپێبکات، ڕووپێوییەکە 45 ڕۆژ دەخایەنێت.

لێدوانی فەرمی: شوان عەباس، سەرپەرشتیاری ڕووپێوی لە دەستەی ئاماری کوردستان بە ئاڤا میدیا ڕاگەیاند، لە کۆتایی ئەم مانگە لە سەرانسەری کوردستان ڕووپێوێکی مەیدانی ئەنجام دەدەین، بە ئامانجی زانینی ڕەوشی تەندروستی خێزان بە گشتیی و تەندروستی ئافرەتان و منداڵان بە تایبەتی لە هەموو پارێزگاکانی کوردستان.

زانیاریی زیاتر: شوان عەباس، دەڵێت، ڕووپێوەکە لە چوار پرسیارنامە پێکهاتووە لەبارەی تایبەتمەندییەکانی خێزان لە ڕووی نیشتەجێبوون و ژمارەی ئەندامانی خێزان و ئاستی خوێندن.

- پرسیارنامەی دووەم تایبەتە بە ئافرەتانی تەمەن 15 ساڵان تاوەکو 49 ساڵان، ئەوانەی لە تەمەنی وەچەخستنەوەن، بەسێ قۆناغ چاودێری دەکرێن ئەو ئافرەتە دووگیانانەی پێش ئەوەی منداڵیان ببێت، کاتی منداڵبوون و دوای منداڵ بوون.

- پرسیارنامەی سێیەم تایبەتە بە منداڵانی تازە لە دایکبوو تاوەکو پێنج ساڵان، چاودێری ڕەوشتی تەندروستیان دەکرێت، پرسیارنامەی چوارەم تایبەتە بە منداڵانی پێنج ساڵان تاوەکو 17 ساڵان، زانیاریی لەسەر ئەو کەسەکان وەردەگرین لە ڕێگەی فۆڕمێکی تایبەت، ئامانجان لەو ڕووپێوییە زانی ڕەوشتی تەندروستیی خێزانە بە گشتی، لەناویان ئافرەتان لەو تەمەنەی دیاریکراوە.

 - منداڵانی تەمەن کەمتر لە پێنج ساڵان، ئەمەش دەبێتە سەرچاوەیەکی گرنگ بۆ ئەوەی لایەنی تەندروستی سوودی لێ ببینن وە ئامانجێکی دیکە ئەوەیە دەبێتە بەشێک لە پەرەپێدانی بەردەوام کە لەلایەن نەتەوەیەکگرتووەکان سەرپەرشتی دەکرێت، بەو داتایە دەتوانرێت ئاستی هەرێمی کوردستان لەگەڵ عێراق بەراورد بکرێت.

ئەمەش بزانە: بۆ ئەو پرۆسە 45 کارمەند ئامادە کراوە لە پارێزگاکانی کوردستان، ڕاهێنانیان پێکراوە، لەسەرجەم پارێزگاکان دەست بە پرۆسەکە دەکرێت.

چۆن پڕۆسەکە ئەنجامدەدرێت: کارمەندەکان لە هەر پارێزگایەک چەند نموونەیەک وەردەگرن، نزیکەی هەزار و 80 خێزان لە هەر پارێزگایەک وەردەگیرێت، لەو خێزانانە پرسیار لەسەر تەندروستی ژن و منداڵان دەکرێن، بۆ ئەوەی بیزانرێت ڕەوشتی تەندروستییان چۆنە و لە چ ئاستێکن.

ئەوەی پێویستە بیزانیت: پرۆسەکە لەلایەن ڕێکخراوی یونسیف پاڵپشتی دەکرێت و بودجەی بۆ دابینکراوە.