بەنداوی سماقوڵی سەرڕێژ دەبێت

ئاڤا نیوز

بەنداوی سماقوڵی کە نزیکەی هەشت ملیۆن مەتر سێجا ئاو دەگرێت سەرڕێژ بووە.

چیرۆکی سەرەکی: هەرچەند ئەمساڵ بەراورد بە ساڵانی ڕابردوو بڕێکی کەمتر باران باریوە، بەڵام بەهۆی بوونی سەرچاوەی ئاو کە دەڕژێنە سەری، بەنداوەکە سەرڕێژبووە.

زانیاری بەدەستهاتوو: سەرچاوەکانی ئاوی بەنداوی سماقوڵی بریتین لە: 

٠ سەرچاوەی ئاوی کونەکرۆژ لە گوندی کرۆژ لە بناری شاخی بنەباوی، ئەم سەرچاوەی ئاوە چوار وەرزی ساڵ بەردەوامە.

٠ کانیاوەکانی گوندی سێنان.

٠ سەرچاوەی ئاوی گوندی سماقوڵی سەروچاوە و سماقوڵی گرتگ.

٠ ئاوی بارانی شاخ و دۆڵەکانی دەوروبەری بەنداوەکە.

لێدوانی فەرمی: نەوا محەممەد، بەڕێوەبەری بەڕێوەبەرایەتی ئاودێری کۆیە بەئاڤا میدیای گوت: دوای سەرڕێژبوونی بەنداوی سماقوڵی پشکنینمان بۆ بەنداوکە کردووە و  قفڵەکانی بەنداوەکەمان کردووەتەوە و تا دوو ڕۆژ کراوە دەبن بۆ ئەوەی لە لم و قوڕ و لیتە پاک ببێتەوە.

زانیاری زیاتر: بەنداوی سماقوڵی  لە سنوری قەزای کۆیە لە پارێزگای هەولێرە ، کەوتووەتە سەر ڕێگای سەرەکی هەولێر - سلێمانی ، هەولێر - ئیدارەی ڕاپەڕین ، بەنداوەکە ساڵی 2013 تەواو بووە و بەرزییەکەی 22 مەترە و درێژییەکەی نزیکەی 110 مەترە.