تاوانی ژینگەیی لە دارستانی دۆڵی ئاکۆیان ئەنجام دەدرێت

ئاڤا نیوز

 

لە دۆڵی ئاکۆیان لە دووشەممەی ڕابردوو 50 داربەڕوو کە بەشێکیان تەمەنیان 10 ساڵە و بەشێکی دیکەش تەمەنیان 10 بۆ 20 ساڵە بە مشاری کارەبایی بڕدراون و هێشتا نەزانراوە ئەنجامدەرانی ئەو تاوانە ژینگەییە کێن و دەستگیر نەکراون.

چیرۆکی سەرەکی: دارستانی دۆڵی ئاکۆیانی سەر بە قەزای ڕواندز تێکدراوە، ئەو شوێنەی دارەکانی لێبردراوە سەیرانگایە و هاونیشتمانیان بۆ سەیران سەردانی شوێنەکە دەکەن.

لێدوانی شایەتحاڵ: تەحسین ئیبراهیم، خاوەنی پاوانەکەیە کە کەسانی نەناسراو دارەکانیان بڕیوەتەوە، دەڵێت: هەر کەسێک ئەم دارانەی بڕیوە لە ناو پاوانی من ئەگەر ئاشکرا بکرێت کێیە لێی خۆشدەبم، بەڵام دەبێت 300 دار لە شار بچێنێت.

لێدوانی فەرمی: ئەحمەد قادر، قائیمقامی ڕواندز بە ئاڤا میدیای گوت : لیژنەیەکمان لە پۆلیسی دارستان و ئاسایش پێکهێناوە، بەدواداچونمان دەست پێکردووە، هەرکەسێک بێت سزای توندی یاسایی دەدرێت.

گوتیشی داواکارین هاونیشتمانیان ژینگە بپارێزن و دوور بکەونەوە لە بڕینی داری دارستانەکان.

باکگراوند: ساڵانە دەیان کەس بەهۆی سەرپێچی بڕینەوەی دار سزا دەدرێن، بەهۆی ئەوەی حکومەتی هەرێم پلانێکی نیشتمانیی هەیە بۆ فراوانکردنی رێژەی سەوزایی، هەروەها هانی خەڵک دەدات بۆ سەوزکردنی ڕووبەرە گونجاوەکان و بەپێی یاسا چاودێریی دارستان و پاوانەکان دەکات و دەیانپارێزێت.