پێنج بڕیاری نوێ لە وەزارەتی داراییەوە لەسەر مووچە و دەستکاریکردنی پارەی خەڵک لە بانکەکان

ئاڤا نیوز

وەزارەتی دارایی بەمەبەستی چارەسەرکردنی کۆمەڵێک کێشە لە سنووری پارێزگاکانی سلێمانی و هەڵەبجە، لەوانە دواکەوتنی مووچە بەتایبەت خانەنشینان، دەستکاریکردنی پارەی خەڵک، خەرجنەکردنی بودجەی بەکارخستن بۆ فەرمانگەکان و بەڵێندەران، دابەشکردنی پارەی دڕاو و تاک هەزاری چەند بڕیارێک دەردەکات.

نووسراوی فەرمی: وەزارەتی دارایی و ئابووریی هەرێمی کوردستان نووسراوێکی بۆ بەڕێوەبەرایەتیی گشتی بانکە بازرگانییەکان گشتاندووە و پێنج بڕیار لەخۆ دەگرێت، نووسراوەکە ڕۆژی پێنجشەممە 20ی ئەم مانگە دەرکراوە، کۆپییەکی دەست ئاڤا کەوتووە و تێیدا هاتووە: بەمەبەستی پاراستنی نەختینەی دابینکراو بۆ مووچە، دروست نەبوونی کێشە بۆ پێشینەی مانگانەی فەرمانگەکان و خەرجییە بەردەوامەکان دەرکراوە.

یەکەم: تەمویلی مووچەی مووچە خۆران و فەرمانبەران ڕاستەوخۆ لە بانکی منارەوە دەنێردرێت بۆ بانکی ئاشتی لەوێشەوە  بۆ بانکەکانی پارێزگای سلێمانی و هەڵەبجە و ئیدارەی گەرمیان و ڕاپەڕین.

دووەم: جەخت دەکەینەوە بە هیچ جۆرێک دەستکاری پارەی هاووڵاتیان لە بانکەکان نەکرێت بەتایبەتی (ئەمانات، توفیر، ودائع،...هتد)، بەپێچەوانەوە ڕێکاری یاساییان لەبەرامبەر دەگیرێتەبەر.

سێیەم: نابێت بە هیچ جۆرێک کێشە بۆ پێشینەی مانگانەی فەرمانگەکان و کۆمپانیاکان و بەڵێندەران دروست بکرێت کە ڕەزامەندی خەرجکردنی وەزارەتیان هەیە.

چوارەم: گشتاندنمان بە ژمارە (28 لە 1- 2- 2024) تایبەت بە پێدانی دەسەڵاتی خەرجی بۆ بەڕێوەبەری بانکەکان وەک خۆی جێبەجێ دەکرێت جگە لە خاڵی دووەم، کە لە بڕی ئەوە خاڵی پێنجەمی ئەم گشتاندنە جێ بە جێ دەکرێت.  {واتا بانکەکان دەسەڵاتیان هەیە مانگانە تا بڕی 10 ملیۆن دینار بۆ فەرمانگەکان خەرج بکەن وەکو بودجەی بەکارخستن}.

پێنجەم: پێویستە هەفتانە هەموو بانکەکان لیستی داهات و خەرجیەکانیان ئاراستەی نووسینگەی تایبەتی وەزارەت بکەن.

هۆکارە زانراوەکان: هەفتەی ڕابردوو لە چەند شوێنێک کێشەی دواکەوتنی مووچە هەبوو،  هەواڵی ئەوەش بڵاوکرایەوە لە بانکەکان دەستکاری پارەی خەڵک کرابێت، بەڵێندەران و فەرمانگەکانی حکومەتیش بەردەوام گلەیی دەکەن پارەی پێویستیان پێناردرێت بۆ خەرجی ڕۆژانە، لە ڕابردوودشدا مووچەخۆران بەردەوام گلەیی ئەوەیان دەکرد تاک هەزاری و پارەی دڕاویان وەکو مووچە پێ دراوە.

ئەم گلەییانە لە سنووری بانکی ناوەندیی هەرێم لە سلێمانی هەبوو، کە سەرپەرشتی سەرجەم بانکەکانی سلێمانی و هەڵەبجە و ئیدارە سەربەخۆکانی گەرمیان و ڕاپەڕین دەکات لەڕووی پارەی کاشەوە.

ئەوەی پێویستە بیزانیت: هەفتەی ڕابردوو ئاوات شێخ جەناب، وەزیری دارایی و ئابووری لە هەولێر لەگەڵ سەرجەم بەڕێوەبەری بانکەکان کۆبووەتەوە و پرسیاری ئەم کێشانەی لێ کردوون، ئەوانیش وتوویانە هەموو ئەو دەسەڵاتانەی لە وەزارەتەوە پێیان داراوە لەلایەن بانقی ناوەندی هەرێم لە سلێمانی لێیان وەرگیراوەتەوە و بۆ هەموو خەرجییەک دەبێت بۆ بانکەکە بگەڕێنەوە، وەزیری داراییش بڕیاری داوە دەستبەجێ سەرجەم کێشەکان چارەسەر بکرێن.

ئەمەش بزانە: بەپێی یاسای وەزارەتی دارایی و ئابووری، هیچ بانکێک بە ناوی بانکی ناوەندیی هەرێم لە سلێمانی نییە  و سەر بە بانکی ناوەندیی عێراقیش نییە، بەڵام پێشتر بەهۆی سەرپەرشتیکردنی پارەی کاش لەو سنوورە بووەتە ئەمری واقیع و وەزارەتیش مامەڵەی لەگەڵ کردووە، بۆیە وەزیری دارایی بڕیاری داوە دەسەڵاتە حکومییەکان لە بانکەکە وەربگیرێتەوە.

 خاڵی ئەرێنی: لەمەودوا لە بانکی منارەی هەولێر ڕاستەوخۆ پارەی مووچە بۆ بانکی ئاشتی سلێمانی بنێردرێت،  لەوێشەوە ڕاستەوخۆ بۆ سەرجەم بانکەکانی سلێمانی و هەڵەبجە و ڕاپەڕین و گەرمیان بنێردرێت، کە پێشتر بۆ بانکی ناوەندی لە سلێمانی دەنێردرا. بەم هەنگاوەش کێشەی دواکەوتنی مووچە، دابەشکردنی پارەی کۆن و دڕاو لەو سنوورە نامێنێت، کاتێک لیستی مووچە ڕاگەیێنرا، مووچەخۆرانی سنووری سلێمانی و دەوروبەری لەگەڵ مووچەخۆرانی هەولێر و دهۆم مووچە وەردەگرن.