ئەمریکا بۆردوومانی فڕۆکەخانەیەکی یەمەن دەکات

 

ئاڤا نیوز

هێرشەکانی ئەمریکا بۆ سەر پێگە و ژێرخانی سەربازی و بەرگری حووسییەکان لە یەمەن بەردەوامە و فڕۆکەکانی ئەو وڵاتە فڕۆکەخانەیەک و چەند ناوچەیەکیان کردە ئامانج.

ئەوەی لەبارەیەوە دەگوترێت: پێنج فڕۆکەی جەنگی ئەمریکا بۆردوومانی فڕۆکەخانەی حەدیدەیان لە ڕۆژئاوای یەمەن کردووە، لەم هێرشەدا ئەمریکا کۆگا و سەکۆی هەڵدانی موشەک و فڕۆکە بێفڕۆکەوانەکانی حووسییەکانیان کردووەتە ئامانج.

زیانە سەرەکییەکان: لە ئەنجامی بۆردوومانی فڕۆکەکانی ئەمریکا، مەنسوور سەعدی فەرماندەی هێزی دەریایی حووسییەکان و حەوت کەسی دیکە برینداربوون.

باکگراوند: لە کۆتایی هەفتەی ڕابردووەوە واشنتۆن هەڵمەتێکی ئاسمانی دژی حوسییەکان دەستپێکردووە، کە شەممەی ڕابردوو بووە هۆی کوژرانی 53 کەس و برینداربوونی 98 کەسی دیکە، لەبەرامبەردا حووسییەکان ڕایانگەیاند، لە دەریای سوور هێرشیان کردووەتە سەر کەشتی فڕۆکە هەڵگری ئەمریکا یو ئێس ئێس هاری ترومان.