هەڤاڵ ئەبوبەکر: وازهێنانم لە پۆستی پارێزگار پەیوەیستە بە ڕێککەوتنی لایەنەکان

ئاڤا نیوز

پارێزگاری سلێمانی وازهێنانی لە پۆستەکەی پەیوەست دەکات بە ڕێککەوتنی لایەنەکانەوە. دەشڵێت، سێ جار داوای بەخشینم لە پۆستەکەم کردووە و هەر کاتێکیش لایەنەکان لەسەر پۆستی پارێزگار ڕێککەوتن، دەستبەرداری پۆستەکەم دەبم.

وێنە گەورەکە: ماوەی هەشت ساڵە هەڤاڵ ئەبوبەکر پارێزگاری سلێمانییە و تا ئێستا نە هەڵبژاردن کراوە و نە پۆستەکانیان لەگەڵ یەکێتی ئاڵوگۆڕ کردووە، پێشووتر پۆستی حکومەتی خۆجێی هەڵەبجە و سلێمانییان بەیەک پاکێج دابەشکردوون.

ئەوەی پێویستە بیزانیت: ساڵی 2016 بە ئامادەبوونی مام جەلال و نەوشیروان مستەفا لە دەباشان ڕێککەوتنێک بۆ ئیدارەدانی پارێزگاکانی سلێمانی و هەڵەبجە کرا و پۆستەکان پەنجا بە پەنجا دابەش کران، تاوەکو ئێستاش 140 پۆستی ئەو دوو پارێزگایە لای بزووتنەوەی گۆڕانن کە پێکدێن لە پارێزگاری سلێمانی، 12 قایمقام، 22 بەڕێوەبەری ناحییە، 18 بەڕێوەبەری گشتیی و ئەوانی دیکەش ڕاوێژکارن.

لێدواننی فەرمی: ئەمڕۆ ڕۆژنامەنووسان لە کۆنگرەیەکی ڕۆژنامەوانیدا سەبارەت بە دەستبەرداربوون لە پۆستەکەی پرسیاریان ئاراستەی د.هەڤاڵ ئەبوبەکر، لە وەڵامدا گوتی، "سێ جار داوای بەخشینم لە پۆستەکەم  کردووە، بەڵام یاسای ژمارە 3 ی ساڵی 2009 ـی ئەنجوومەنی پارێزگاکان ڕێگەی بە ئێمەداوە وەک پارێزگار بەردەوام بین تاوەکو هەڵبژاردنی ئەنجوومەنی پارێزگاکان دەکرێت."

- "هەر کاتێک بزووتنەوەی گۆڕان، یەكێتی و پارتی لەسەر حکومەتی خۆجێی نوێ ڕێککەوتن دەستبەرداری پۆستەکە دەبین."

لەلایەکی دیکەوە: سەبارەت بەوەی کە یەکێتی داوای پۆستەکانی لە گۆڕان دەکاتەوە، دلێر عەبدولخالق، وتەبێژی بزووتنەوەی گۆڕان گوتی، "تاوەکو ئێستا هیچ کۆبوونەوەیەک لەسەر ئەو بابەتە نەکراوە و یەکێتی نیشتمانی کوردستان بە فەرمی داوای پۆستەکانی نەکردووەتەوە."

باکگراوند: د. هەڤاڵ ئەبوبەکر ڕۆژی 04-12-2017 بووە پارێزگاری سلێمانی و تاوەکو ئێستا لە کارەکانی بەردەوامە، دوای ئەوەی د.ئاسۆ فەرەیدوون بەگوێرەی ڕێککەوتنی نێوان گۆڕان و یەكێتی داوای بەخشینی لە پۆستەکەی کرد.