جومانە غەلای: نابێت دەنگدەر تۆماری بایۆمەتریی بگوازێتەوە کەرکووک

ئاڤا نیوز

 

وتەبێژی کۆمیسیۆنی هەڵبژاردنەکانی عێراق ئاشکرای دەکات، ڕێگە بە هیچ هاووڵاتییەک نادرێت تۆماری دەنگدانی بایۆمەتریی خۆی بۆ پارێزگاکانی کەرکووک، نەینەوا، ئەنبار و سەڵاحەددین بگوازێتەوە.

 

وێنە گەورەکە: ڕۆژی سێشەممە  25ـی 3، پرۆسەی نوێکردنەوەی تۆماری بایۆمەتری دەستیپێکرد و بۆ ماوەی مانگێک بەردەوام دەبێت؛ هاوکات بڕیارە لەنێوان مانگی 10 بۆ 11ی ئەمساڵ هەڵبژاردنی پەرلەمانی عێراق بکرێت.

 

لێدوانی فەرمی: جومانە غەلای، وتەبێژی کۆمیسۆنی باڵای سەربەخۆی ‌هەڵبژاردنەکانی عێراق لە کۆنگرەیەکی ڕۆژنامەوانیدا ڕایگەیاند: دەنگدەر دەتوانێت تۆماری بایۆمەتریی خۆی لە ناوخۆی پارێزگا یاخود لە پارێزگایەک بۆ پارێزگایەکی دیکە بگوازێتەوە جگە لە پارێزگاکانی کەرکووک، نەینەوا، ئەنبار و سەڵاحەددین نەبێت. ئەمەش لەپێناو پاراستنی دیمۆگرافیای ئەم ناوچانە، بەڵام هەر دەنگدەرێک فۆرمی خۆراکی ماوەی پێش 9-12-2003 هەبێت، دەتوانێت تۆماری بایۆمەتریی خۆی بۆ ئەو چوار پارێزگایانە بگوازێتەوە.

 

ئەوەی پێویستە بیزانیت: غەلای داوا لە دەنگدەری نوێ کە لە دایکبووی ساڵی 2007ـن دەکات سەردانی نزیکترین ناوەندی تۆمارکردنی تۆماری بایۆمەتری بکەن بۆ تۆمارکردنی ناوەکانیان لەپێناو بەشداریکردن لە هەڵبژاردنی داهاتوودا. جومانە غەلای دەشڵێت، دەنگدەرانی نوێ زیاترن لە ملیۆنێک دەنگدەر و بەم پێیەش کۆی گشتیی ئەوانەی مافی دەنگدانیان هەیە زیاترە لە 29 ملیۆن دەنگدەر.

 

زانیاریی زیاتر: بەگوێرەی کۆمیسیۆنی هەڵبژاردنەکان، نوێکردنەوەی تۆماری بایۆمەتری لە هەزار و 79 ناوەندی تۆمارکردن لە سەرتاسەری عێراق دەکرێت، پرۆسەکە بریتیە لە زیادکردنی ناوی نوێ، ڕاستکردنەوە، گۆڕانکاریکردن، لابردن، تۆمارکردنی ئاوارەکان و هێزە ئەمنییەکان.