گۆڕانکاری لە کارنامەی دانیشتنی ئەمڕۆی پەرلەمانی عێراق دەکرێت

ئاڤا نیوز

پەرلەمانی عێراق کارنامەی دانیشتنەکەی ئەمڕۆی بڵاوکردەوە و بڕگەیەکی تایبەتی بە حەشدی شەعبی بۆ زیاد کرا.

چیرۆکی سەرەکی: کۆبوونەوەی شەوی ڕابردوو 25-03-2025ـی پەرلەمانی عێراق بەهۆی تەواونەبوونی ڕێژەی یاساییەوە نەکرا، بڕیاربوو بەگوێرەی کارنامەی دانیشتنەکە دەنگ لەسەر بەپارێزگابوونی هەڵەبجە بدرێت. بەڵام کۆبوونەوەکە بۆ ئەمڕۆ چوارشەممە دواخرا و بڕگەی یاسای حەشدی شەعبی بۆ زیادکرا.

ڕاگەیێنراوی فەرمی: بە گوێرەی ڕاگەیێنراوی نووسینگەی ڕاگەیاندنی پەرلەمانی عێراق، بڕیارە کاتژمێر 8ـی ئێوارەی ئەمڕۆ چوار شەممە 26-3-2025 دانیشتنی پەرلەمانی عێراق بکرێت و ئەم بڕگانە لەخۆدەگرێت:

یەکەم: دەنگدان لەسەر پرۆژەیاسای بەپارێزگابوونی هەڵەبجە.

دووەم: دەنگدان لەسەر هەمواری یەکەمی پرۆژەیاسای هاوتاکردنی بڕوانامە و پلەی زانستی عەرەبی و بیانی.

سێیەم: دەنگدان لەسەر هەمواری یەکەمی پرۆژەیاسای خوێندنی باڵای ناحکومی.

چوارەم: ڕاپۆرت و خوێندنەوەی دووەم بۆ پڕۆژەیاسای دەستەی حەشدی شەعبی.
 
پێنجەم: ڕاپۆرت وگفتوگۆکردن و خوێندەوەی دووەم بۆ یاسای پارێزگاری ژینگە.

شەشەم: ڕاپۆرت و خوێندنەوەی دووەم بۆ هەمواری یاسای ئەنجوومەنی نوێنەران و دامەزراوەکانی.