وردەکاری ڕەشنووسی یاسای حەشدی شەعبی ئاشکرا دەکرێت

ئاڤا نیوز

وردەکاری ڕەشنووسی یاسای خزمەت وخانەنشینی حەشدی شەعبی ئاشکرا دەبێت، بەپێی یاساکە دامەزراوەی حەشد لە سوپا بەهێزتر دەبێت و سەرۆکەکەشی پلەی وەزیر وەردەگرێت.

چیرۆکی سەرەکی: ڕۆژنامەی (The National)ـی ئینگلیزی وردەکاری ڕەشنووسی یاسای حەشدی شەعبی بڵاوکردەوە، کە 18 بڕگە لەخۆدەگرێت و خوێندنەوەی یەکەمی لەپەرلەمانی عێراق بۆکرا و زۆرینەی لایەنە شیعییەکان سورن لەسەر تێپەڕاندنی یاساکە بەبێ هیچ گۆڕانکارییەک لەم خولەی ئێستادا.

وێنە گەورەکە: دوای ئەوەی هێرشی چەکدارانی داعش بۆ سەر عێراق دەستیپێکرد، بە فتوای ئاینیی لە نەجەف ئەو گرووپە چەکدارییە دروستکرا، دواتر یاسای دەستەی حەشدی شەعبی بە زۆرینەی دەنگ لە 2016 پەسندکرا و هێزەکەی کرد بە هێزێکی یاسایی لە چوارچێوەی هێزە سەربازییەکانی عێراق.

ئه‌وه‌ی له‌باره‌یه‌وه‌ دەگوترێت: بەگوێرەی ڕەشنوسی یاساکە وەک ئەوەی ڕۆژنامەکە ئاماژەی پێداوە، حەشدی شەعبی وەک دامەزراوەیەکی سەربازی فەرمی مامەڵەی لەگەڵدا دەکرێت، دەزگای هەواڵگریی تایبەت بەخۆی دەبێت و دەتوانێت ئۆپەراسیۆنی سەربازی تایبەت ئەنجام بدات، هاوکات هێزەکانی حەشدی شەعبی  نوێترین ئامێری تەکنەلۆژیای سەربازییان بۆ دابین دەکرێت و ئەکادیمیایەکی تایبەت بۆ ئەندامەکانی دادەمەزرێت.

ئەوەی پێویستە بیزانیت: لە ڕووی کارگێڕییەوە سەرۆکی دەستەی حەشدی شەعبی پلەی وەزیری پێدەدرێت و دەبێتە ئەندامی هەمیشەیی لیژنەی وەزاری بۆ ئاسایشی نیشتمانی، هەر بەو پلەیەش خانەنشین دەکرێت.

ئەمەش بزانە: لەدوای شکستی داعشەوە  بودجە و ئەندامانی حەشدی شەعبی بەشێوەیەکی بەرچاو زیادی کردووە و ژمارەی ئەندامانی لە 122 هەزارەوە بۆ 238 هەزار زیادی کردووە، بودجەکەشی لە 2.16 ملیار دۆلارەوە 3.4 ملیار دۆلار زیادیکردووە.