وەزیری دەرەوەی ئوردن لەسەر گرتە ڤیدیۆیەکی یاریی عێراق و فەڵەستین هاتە دەنگ

ئاڤا نیوز

فوئاد حوسێن، وەزیری دەرەوەی عێراق و ئەیمەن سەفدی، هاوتا ئوردنییەکەی بە تەلەفۆن قسەیان کرد، سەفدی دووپاتی کردەوە کە گرتە ڤیدیۆکەی یاریی عێراق و فەڵەستین "ساختە"یە.

چیرۆکی سەرەکی: لە ڕۆژی 25ـی ئەم مانگە، یاریی نێوان هەردوو هەڵبژاردەی عێراق و فەڵەستین، لە ئوردن بەڕێوەچوو لە چوارچێوەی گەڕی هەشتەمی کۆمەڵەی دووی پاڵاوتنەکانی کیشوەری ئاسیا بۆ گەیشتن بە جامی جیهانی 2026، گرتە ڤیدیۆیەک بڵاوبوویەوە کە جەماوەری فەڵەستین و ئوردن دەستەواژەی "گەواد" وەک سووکایەتیکردن دژی هەڵبژاردەی عێراق بەکار دێنن.

ڕاگەیێنراوی فەرمی: بەگوێرەی وەزارەتی دەرەوەی عێراق، ئەیمەن سەفدی بۆ هاوتا عێراقییەکە دووپاتی کردەوە؛ لێکۆڵینەوە تەکنیکییەکان سەلماندوویانە کە ئەو گرتە ڤیدیۆییە بڵاوکراوە ساختەیە و بەهیچ شێوەیەک ڕاستی نییە، لێکۆڵینەوەکان بەردەوامن بۆ دەستنیشانکردنی ئەوانەی لەپشت ئەم هەڵمەتە چەواشەکارییانەن.