شارەوانیی سلێمانی لەسەر ڕشتنی چیمەنتۆ لە شەقامەكان دێتە دەنگ

ئاڤا نیوز

 

شارەوانیی سلێمانی ڕێكکاری یاسایی بەرامبەر كۆمپانیاكانی بەرهەمهێنانی چیمەنتۆ دەگرێتەبەر كە ئۆتۆمبێلەكانیان لەكاتی گواستنەوە، چیمەنتۆ لە شەقامەكان دەڕژێنن و گرفتی هاتووچۆ دروست دەكەن.

 

چیرۆكی سەرەكی: دوێنێ هەینی لە شەقامی سەرەكی قوولەرەیسی لە شاری سلێمانی، ئۆتۆمبێلێكی گواستنەوەی چیمەنتۆی كۆمپانیاكانی بەرهەمهێنانی چیمەنتۆ، بڕێكی زۆر چیمەنتۆی لە شەقامەكە ڕشتووە و بەهۆیەوە گرفتی هاتووچۆ دروستبووە و ڕووداوی هاتووچۆشی لێكەوتووەتەوە.

 

ڕاگەیێنراوی فەرمی: سەرۆكایەتیی شارەوانیی سلێمانی ڕایگەیاند، بەداخەوە بەشێک لە کۆمپانیاکانی بەرهەمهێنانی چیمەنتۆ لەکاتی گواستنەوەی چیمەنتۆ پابەندی شێوازی کارەکانیان نابن و بەشێک لە چیمەنتۆکانیان لەناو شەقامە سەرەکییەکاندا دەڕژن و شەقامەکە دەشێوێنن و گرفت بۆ هاووڵاتییان دروستدەكەن كە زۆرجار مەترسی ڕووداوی نەخوازراوی لێدەكەوێتەوە.

 

چی ڕوودەدات: سەرۆكایەتیی شارەوانیی سلێمانی ڕێکاری یاسایی بەرامبەر ئەو كۆمپانیایانە دەگرێتەبەر كە یەكێك لە ئۆتۆمبێلەكانی گرفتی هاتووچۆی لە شەقامی قوولەرەیسی دروستكردووە و ژمارەی ئۆتۆمبێل و ناوی كۆمپانیاكە لەلای شارەوانیی سلێمانی پارێزراوە، داوای لێكردووە دوای جەژن سەردانی بەشی خزمەتگوزاریی شارەوانیی سلێمانی بكات بۆ جێبەجێكردنی پابەندیە یاساییەكانی.