ڕوونکردنەوەیەکی تایبەت بۆ خانەنشینانی نوێ لەبارەی گەڕاندنەوەی خزمەت

ئاڤا نیوز

بەڕێوەبەرایەتیی گشتیی خانەنشینی سەرجەم خانەنشینان ئاگادار دەکاتەوە، بەهیچ جۆرێک مامەڵەی گەڕاندنەوەی خزمەت نەکەن و بۆیان هەژمار ناکرێت.

چیرۆکی سەرەکی: ئەمساڵ تەمەنی خانەنشینی گۆڕانی بەسەردا هات و لە 63 ساڵەوە بووە 60 ساڵ، بەو هۆیەوە چەند لە دایکبووێک بەکۆمەڵ پێکەوە خانەنشین بوون، ئەوانیش لە دایکبووانی 1963، 1962، 1964 و 1965بوون. 

بەشێك لەوان خزمەتی سەربازی و خزمەتی شوێنی دیكەیان نەگەڕاندبووەوە، لە پڕێكیشدا خانەنشینکران و  نەیانتوانیوە مامەڵەی گەڕاندنەوەی خزمەتەكەیان بکەن، ژمارەیەك لەوان داوایان لە ئاڤا کرد بەدواداچوونیان بۆ بكەین و لە لایەنی پەیوەندیدارەوە بەرچاوڕوونییان بۆ وەربگرین.

لێدوانی فەرمی: سەرچاوەیەک لە بەڕێوەبەرایەتیی گشتیی خانەنشینیی هەرێمی كوردستان بە ئاڤای ڕاگەیاند: بەهیچ شێوەیەك هیچ خزمەتێك لەدوای خانەنشین بوون ناگەڕێنرێتەوە، پێویست ناكات هیچ خانەنشینێک مامەڵە پێشكەش بكات، چونكە ئەنجامی نابێت.

- هۆکارەکە کەمتەرخەمی خانەنشینەکان خۆیانە، دەبووایە زوو بەدواداچوونیان بۆ ئەو بابەتەی خۆیان کردبا.

- دەبوو ئەو كەسانە لە ساڵانی ڕابردوودا مامەڵەی هێنانەوەی خزمەتیان كردبا، نەك ئێستا كە بڕیاری خانەنشینییان دراوە.

- ئەگەر کێشەکە لەلایەن حکومەتی هەرێمی کوردستان بووایە کارەکان ئاسانتر دەبوو بۆ چارەسەرکردنی چونکە لەگەڵ ئەوە نییە هیچ کەسێک لە مافەکەی بێبەش بێت، بەڵام فایلی مووچە و خانەنشینان لە بەغدایە، تەیف سامی، وەزیری دارایی عێراق بەهیچ شێوەیەک بە گەڕاندنەوەی خزمەتیان ڕازی نابێت.

چارەسەر: بەڕێوەبەرایەتیی گشتیی خانەنشینی فەرمانبەران ئاگادار دەکاتەوە ئەوانەی تەمەنیان لە خانەنشینبوون نزیکە، ئەگەر کێشەی خزمەتیان هەیە بەخێرایی دەست بە گەڕاندنەوەی خزمەتیان بکەن پێش ئەوەی بڕیاری خانەنشینبوونیان بدرێت.