ئەوقاف و وەقفی سوننی لە کەرکووک: دووشەممە جەژنە

ئاڤا نیوز

بەڕێوەبەری ئەوقاف و لقی کەرکووکی وەقفی سوننی ڕایدەگەیێنن، سبەی یەکشەممە تەواوکەری مانگی ڕەمەزانە و ڕۆژی دووشەممە جەژنە.

وێنە گەورەکە: ساڵانە لەبارەی یەکەم ڕۆژی جەژنی ڕەمەزان جیاوازی تەنیا لەنێوان شیعە و سوننە هەبوو، بەڵام ئەمساڵ سوننەکانیش بەسەر دوو بەرە دابەش بوون، ئەنجوومەنی باڵای فەتوای عێراق کە سوننەن سبەیان کردە جەژن، بەڵام دیوانی وەقفی سوننەی نەیکرد بە جەژن، ئەمە لەکاتێکدایە هەرێمی کوردستان سبەی کردووەتە جەژن.

ئەوەی پێویستە بیزانیت: کورد لە کەرکووک کە زیاتر لە 50%ـی دانیشتووی شارەکەن، لەنێوان وەقفی سوننە و حکومەتی هەرێمی کوردستان سەریان لێشێواوە سبەی بیکەن بە جەژن یان نا؟

لێدوانی فەرمیی: سالم زەنگەنە، بەڕێوبەری وەقفی سوننی کەرکووک بە ئاڤای گوت: "سبەی یەکشەممە لە کەرکووک تەواوکەری مانگی ڕەمەزانە و ڕۆژی دووشەممە یەکەم ڕۆژی جەژنی ڕەمەزانی پیرۆزە."

لە لێدوانێکی دیکەشدا دەڵێت: هەر کەسێک دەیکات بە جەژن با بچێتە هەولێر و سلێمانی.

لەلایەکی دیکەوە: نەبەز ئیسماعیل، گوتەبێژی وەزارەتی ئەوقافی هەرێمی کوردستان بە ئاڤای گوت، بڕیارەکەی وەقفی سوننەی عێراق هیچ کاریگەرییەکی لەسەر هەرێمی کوردستان نابێت،  بڕیاری کۆتایی لای حکومەتی کوردستانە و سبەی لە هەریمی کوردستان جەژنە.