حکومەتی نوێی ڕاگوزەری سووریا ڕاگەیێنرا

ئاڤا نیوز

 

بەسەرپەرشتیی ئەحمەد شەرع، سەرۆککۆماری سووریا بۆ قۆناغی ڕاگوزەر، حکومەتی نوێی ڕاگوزەری سووریا ڕاگەیێنرا و کابینەیەکە تەنیا یەک ئافرەتی تێدایە، هاوکات چەندین سەرکردەی شۆڕشی سووریا کە لە ساڵی 2011 دژی ڕژێمی پێشوو دەنگیان هەڵبڕی، تێدایە.

 

چیرۆکی سەرەکی: لە 13ـی 3، لیژنەی نووسینەوەی دەستووری کاتیی سووریا کە لەلایەن شەرع ڕاسپێردرابوو، دوای 11 ڕۆژ کۆتایی بە کارەکانی هێنا و دەستووری کاتیی سووریا بۆ قۆناغی ڕاگوزەر نووسیەوە کە ماوەی پێنج ساڵە و شەرعیش پەسەندی کرد. هاوکات ئێوارەی شەممە 29ـی 3 ـی 2025، حکومەتی ڕاگوزەری سووریا پێکهێنرا.

 

ڕاگەیێنراوی فەرمی: ئەحمەد شەرع، سەرۆککۆماری سووریا لە گوتارێکی دا لە مەڕاسیمی ڕاگەیاندنی حکومەتی نوێ ڕایگەیاند: لە ئێستادا شاهیدی لەدایکبوونی قۆناغێکی نوێین لە مێژووماندا.

 

زانیاریی بەدەستهاتوو: ئەسعەد شەیبانی، وەزیری دەرەوە و مورهەف ئەبو قەسرە، وەزیری بەرگری لە پۆستەکانیان مانەوە و ئەنەس خەتتاب، سەرۆکی دەزگای هەواڵگریی نیشتمانی پۆستی وەزیری ناوخۆی وەرگرت.

 

زانیاریی زیاتر: وەزیرانی کابینەی نوێی حکومەتی کاتیی سووریا:

مەزهەر وەیس، وەزیری داد.
محەممەد یوسر بەرنیە، وەزیری دارایی.
موسعەب نزار، وەزیری تەندروستی.
محەممەد ئەبو خەیر شوکری، وەزیری ئەوقاف.
محەممەد بەشیر، وەزیری وزە.
مەروان حەلەبی، وەزیری خوێندنی باڵا.
هیند قەبووات، تاکە وەزیری ئافرەتە و پۆستی وەزیری کار و کاروباری کۆمەڵایەتیی پێدرا.
نیزال شەعار، وەزیری ئابووری.
حەمزە مستەفا، وەزیری ڕاگەیاندن.
یەعرب بەدر، وەزیری گواستنەوە.
محەممەد ئیسکاف، وەزیری گەشەپێدان.
مازن ساڵحانی، وەزیری گەشتوگوزار.
محەممەد سامح حامز، وەزیری وەرزش و لاوان.
محەممەد ساڵح، بێژەری کەناڵی "جەزیرە" بووە وەزیری ڕۆشنبیری.
مستەفا عەبدولڕەزاق، وەزیری ئاوەدانکردنەوە و نیشتەجێکردن.
محەممەد عەبدولڕەحمان ترکۆ، وەزیری پەروەردە و فێرکردن.
ئەمجەد بەدر، وەزیری کشتوکاڵ.
عەبدولسەلام هەیکەل، وەزیری پەیوەندییەکان و تەکنەلۆجیای زانیاری.
ڕائید ساڵح، وەزیری فریاکەوتن و بەڕێوەبردنی کارەساتەکان.
محەممەد عەنجەرانی، وەزیری ئیدارەی خۆماڵی و خزمەتگوزارییەکان.