ئەردۆغان: 10 ڕۆژە هەوڵ دەدرێت لەسەر شەقام گەندەڵیی و تیرۆر پەردەپۆش بکرێت

 

ئاڤا نیوز

ڕەجەب تەیب ئەردۆغان، خۆپیشاندانەکانی لایەنگرانی جەهەپە بە هۆکارێک بۆ "پەردەپۆشکردنی گەندەڵیی و تیرۆر" دادەنێت، سەبارەت بە پرسی پەکەکەش دەڵێت: بە خۆ هەڵوەشاندنەوەی پەکەکە و ڕادەستکردنەوەی چەکەکانیان، تورکیا لە کۆت و بەندێکی دیکە ڕزگاری دەبێت کە ماوەی 40 ساڵە بە قاچەکانییەوە بەستراوە".

چیرۆکی سەرەکی: ماوەی 10 ڕۆژە لە شارەکانی ئیستەنبووڵ و ئەنقەرە، وەک ناڕەزایەتی دەربڕین بەرامبەر بە دەستگیرکردنی ئەکرەم ئیمامئۆغلو، سەرۆکی گەورە شارەوانی ئیستەنبووڵ لایەنگرانی جەهەپە ڕژاونەتە سەر شەقامەکان، ڕۆژانە بە ملیۆنان کەس لە شەقامی سەراچهانیێ ئیستەنبووڵ کۆدەبنەوە و هێرش دەکەنە سەر پۆلیس و گرژی و ململانێ دروست دەبێت.

بڵاوکراوەی فەرمی: ئەردۆغان لە پەیامێکی ڤیدیۆیی بە بۆنەی جەژنی ڕەمەزان دەڵێت: گەلی خۆشەویستم، لێکۆڵینەوەکان لە تاوانی گەندەڵیی و ڕەشوە وەرگرتن بەردەوامە، تا تەواو بوونی ئەو لێکۆلینەوانە دەردەکەوێت پەتی تاوانەکانی ئەو شارەوانییانە تا کوێ درێژدەبێتەوە.

ئەو گردبوونەوانەی لە دوایین 10 ڕۆژی ڕەمەزانەوە دەستیپێکردووە، جگە لە پەردەپۆشکردنی تاوانی گەندەڵفی و تیرۆر، هیچ شتێکی دیکە نییە.

هەوڵەکان بۆ فشارخستنە سەر ئەندامانی دەسەڵاتی دادوەریمان بە هەڕەشەکردن لە خێزان و منداڵەکانیان تا ئێستا سەرکەوتوو نەبوون. میللەتەکەمان بە تێگەیشتنە بەرفراوانەکەیەوە، تەڵەکەی بینی و نەکەوتە بەر هەوڵە ئیستفزازیەکان.

لە لایەکی دیکەوە: لە بارەی چەکدانانی پەکەکەو پرۆسەی ئاشتی، ئەردۆغان گوتی: دوای ئەوەی پەکەکە چەکەکانی ڕادەست دەکاتەوە کۆت و بەندێکی دیکەی 40 ساڵەی قاچی تورکیا دەکرێتەوە، بەمەش دیموکراسی براوە دەبێت کە موڵکی 85 ملیۆن تاکی تورکیایە.