یەکەم هەڵوێستی ئەمریکا لەبارەی پێکهێنانی حکومەتی نوێی سووریا

ئاڤا نیوز

وەزارەتی دەرەوەی ئەمریکا ڕایگەیاند، واشنتن ئومێدەوارە پێکهێنانی حکومەتی نوێی سووریا هەنگاوێکی ئەرێنی بێت بۆ هێنانەکایەی سووریایەکی گشتگیر کە نوێنەرایەتی هەمووان بکات.

ئەوەی پێویستە بیزانیت: ڕۆژی شەممەی ڕابردوو حکومەتی سووریا بۆ قۆناغی ڕاگوزەر پێکهێنرا، ئەحمەد شەرع، سەرۆککۆماری سووریاش ڕایگەیاند، بەڵێن دەدات دۆسیە کۆمەڵایەتیی و ئابوورییەکان و ئەو بابەتانەی پەیوەندییان بە مافەکانی مرۆڤەوە هەیە، چارەسەریان بکات.

لێدوانی فەرمی: تامی بروس، وتەبێژی وەزارەتی دەرەوەی ئەمریکا بە ڕۆژنامەنوسانی ڕاگەیاند، پێویستە دەسەڵاتدارانی کاتی سووریا بە تەواوی ڕووبەڕووی تیرۆر ببنەوە و سەرکوتی بکەن، هەروەها چەکدارانی بیانی لە هەموو دامەزراوە فەرمییەکان دووربخەنەوە و ڕێگەش نەدەن ئێران و گرووپەکانی سەر بەو وڵاتە، خاکی سووریا بۆ ئامانجەکانیان بقۆزنەوە.

- دەسەڵاتدارانی کاتی سووریا هەنگاوی پێویست بۆ لەناوبردنی چەکی کیمیایی سەردەمی ئەسەد بگرنەبەر.

- دەسەڵاتدارانی کاتی سووریا هاوکاربن لە گەڕانەوەی هاووڵاتیانی ئەمریکا و گەرەنتیکردنی ئازادیی کەمینە ئاینیی و نەتەوەییەکانی سووریا.

لە چاودێریکردنی هەڵسوکەوتی دەسەڵاتدارانی سووریا بەردەوام دەبین و لەسەر بنەمای ڕەفتارەکانیان، ڕێکار دەگرینەبەر.

گۆڕانکاریی لە سیاسەتی ئەمریکادا بەرامبەر دەسەڵاتدارانی کاتی سووریا مەرجدارە بەو هەنگاوانەی باسمان کردن.