گۆڤارێکی ئەمریکی: ئێران پلانی هەیە لە عێراق و سووریا بنکەکانی ئەمریکا بکاتە ئامانج

ئاڤا نیوز

گۆڤارێکی ئەمریکی ئاشکرای دەکات کە لە ئەگەری جێبەجێکردنیدا هەڕەشەکانی ترەمپ بۆ ئەنجامدانی هێرشی سەربازیی بۆسەر ئێران، ئەو وڵاتەش پلانی هەیە بە مووشەکی دوورمەودا بنکەکانی ئەمریکا لە عێراق و سووریا تۆپباران بکات.

چیرۆکی سەرەکی: دۆناڵد ترەمپ، سەرۆکی ئەمریکا لە کۆتا چاوپێکەوتنیدا لەگەڵ تۆڕی ئێن بی سی ڕایگەیاند، ئەگەر ئێران ئامادە نەبێت لەسەر مێزی دانوستان لەگەڵ واشنتن گفتوگۆ بکات، تاران ڕووبەڕووی هێرشی سەربازیی دەبێتەوە و ئەویش بەجۆرێک دەبێت کە "هەرگیز وێنەی نەبووە".

زانیاریی بەدەستهاتوو: گۆڤاری نیوزویکی ئەمریکی بڵاویکردەوە، ئێران خۆی ئامادە دەکات بۆ ئەوەی لەکاتی جێبەجێکردنی هەڕەشەکانی دۆناڵد ترەمپدا، بنکە سەربازییەکانی ئەمریکا لە عێراق و سووریا تۆپباران بکات.

زانیاریی زیاتر: گۆڤارەکە هەواڵەکەی وەک زانیاریی دروست بڵاوکردووەتەوە و ئەوەشی خستووەتەڕوو، سوپای پاسدارانی ئێران مووشەکی دوورمەودای لە هەموو بنکە و ژێر زەمینە سەربازییەکانی بە درێژایی سنووری عێراق بڵاوکردووەتەوە.

لەلایەکی دیکەوە: گۆڤارەکە ئاماژەی بە شێوازی وەڵامدانەوەی ئێران بۆ هەڕەشەکان نەکردووە کە ئایا ئیسرائیل و کەشتییە ئەمریکییەکانیش لە کەنداو دەکاتە ئامانج یاخود نا، بەڵام جەختیکردووەتەوە کە پلانەکەی ئێران لەم قۆناغەدا تەنیا بەکارهێنانی مووشەکی دوور مەودا بۆ کردنە ئامانجی بنکە سەربازییەکانی ئەمریکا لە عێراق و سووریا لەخۆدەگرێت.