سوودانی بۆ پزیشکیان: هەڕەشەکانی سەر ئێران ڕەتدەکەینەوە

ئاڤا نیوز

سەرۆکوەزیرانی عێراق بەتەلەفۆن لەگەڵ سەرۆککۆماری ئێران قسەی کرد و ڕایگەیاند، وڵاتەکەی ئەو هەڕەشانە ڕەتدەکاتەوە کە لە ئێران دەکرێن، جەختیشیکردەوە لەسەر ئەوەی بەغدا پابەندە بە پاراستنی ئاسایش و سەقامگیریی تاران، بۆ ڕووبەڕووبوونەوەی ئاستەنگییەکانیش جەخت لە هەماهەنگیی و پێکەوەکارکردن کرایەوە.

چیرۆکی سەرەکی: دۆناڵد ترەمپ، سەرۆکی ئەمریکا لە کۆتا چاوپێکەوتنیدا لەگەڵ تۆڕی ئێن بی سی ڕایگەیاند، ئەگەر ئێران ئامادە نەبێت لەسەر مێزی دانوستان لەگەڵ واشنتن گفتوگۆ بکات، تاران ڕووبەڕووی هێرشی سەربازیی دەبێتەوە و ئەویش بەجۆرێک دەبێت کە "هەرگیز وێنەی نەبووە".

ڕاگەیێنراوی فەرمی: نوسینگەی ڕاگەیاندنی سەرۆکوەزیرانی عێراق بڵاویکردەوە، محەممەد شیاع سوودانی، سەرۆکوەزیرانی عێراق بەبۆنەی جەژنی ڕەمەزانەوە پەیوەندییەکی تەلەفۆنی لە مەسعود پزیشکیان سەرۆککۆماری ئێرانەوە پێگەیشت، لە پەیوەندییەکەشدا جەخت کرایەوە لەسەر هەماهەنگی نێوان وڵاتانی ئیسلامی، بۆ ڕووبەڕووبوونەوەی ئاستەنگیی و مەترسییەکان لەپێناو بەدیهێنانی ئاسایش و سەقامگیریی.

- سەرۆکوەزیرانی عێراق جەختی کردەوە لەسەر ئەوەی کە عێراق هەڕەشەکانی سەر کۆماری ئیسلامی ئێران ڕەتدەکاتەوە، پابەندبوونی بەغداشی بە ئاسایش و سەقامگیریی ئەو وڵاتە دووپاتکردەوە.

- هەردوولا جەختیان کردەوە لەسەر گرنگی بەهێزکردنی هاوکاری دوو لایەنە لە بوارە جیاوازەکان، بەشێوەیەک کە لە بەرژەوەندیی هەردوو وڵات و گەلەکانیاندا بێت.