عێراق کار لەسەر پڕۆژەیەکی تایبەت بە بارانی دەستکرد دەکات

ئاڤا نیوز

وەزارەتی گواستنەوەی عێراق ڕایگەیاند، بەمەبەستی جێبەجێکردنی پڕۆژەی بارانی دەستکرد، کۆبوونەوەیان لەگەڵ دوو کۆمپانیای ئوسترالی و ئەڵمانی ئەنجامداوە و لە داهاتووشدا بە کرداریی کار بۆ جێبەجێکردنی پڕۆژەکە دەکەن.

ئەوەی پێویستە بیزانیت: بیرۆکەی ئەم پڕۆژەیە تازە نییە و ساڵی ڕابردووش دەستەی ڕاوێژکاران لە ئەنجوومەنی وەزیرانی عێراق بەهاوکاریی وەزارەتی سەرچاوەکانی ئاو و ژینگە پڕۆژەی بارانی دەستکردییان تاوتوێ کرد، بەڵام بەهۆی ئەوەی پڕۆژەکە بودجە و وردەکاری زانستی زۆر هەیە پار پڕۆژەکە نەکەوتە بواری جێبەجێکردنەوە، تەرخانکردنی بودجە و خودی پڕۆژەکەش ئێستا لە ئەنجوومەنی وەزیرانە.

ڕاگەیێنراوی فەرمی: وەزارەتی گواستنەوەی عێراق ڕایگەیاند، تیمی زانستیی تایبەتی وەزارەتەکەیان بۆ بارانی دەستکرد لەگەڵ کۆمپانیای بارانی دەستکردی ئوسترالی ART و کۆمپانیای ئەڵمانی تایبەتمەند بە تەکنیکی بارانی دەستکرد CST کۆبووەتەوە، بۆ بینین و چاودێریکردنی کارەکانیان.

لەلایەکی دیکەوە: سەلمان بەهادلی، بەڕێوەبەری دەستەی گشتی کەشناسی و بومەلەرزەزانی عێراق ئاشکرای کرد، کۆبوونەوەکەیان بەشێوەی ڤیدیۆ کۆنفرانس بووە و تیایدا چۆنییەتی کارکردنی ئەو کۆمپانیایانە و ئەزموونیان بۆ بارانی دەستکرد تاوتوێ کردووە، گفتوگۆش لەسەر ئەو پڕۆژانە کراوە کە ئەو کۆمپانیایانە لە هەندێک وڵات جێبەجێیان کردووە.

- بەوتەی ئەو بەرپرسەی کەشناسی، لە کۆبوونەوەکەدا ئەو ئاستەنگییانەش تاوتوێ کراون کە بەهۆی گۆڕانکارییەکانی کەشوهەوا هاتوونەتە ئاراوە و بوونەتەهۆی کەمبوونەوەی سەرچاوەکانی ئاو، هاوکات تیمە عێراقییەکە هەندێک پرسیاری وردی کردووە بە ئامانجی سەرکەوتنی ئەو پڕۆژەیە لە عێراق لە ماوەکانی داهاتوودا.